MLA Lalrintluanga Sailo a herliam!

Aizawl | July 21, 2025: Dampa bialtu MLA, Lalrintluanga Sailo chu Delhi-ah a thi.

Damlohna avang bawka Delhi-a awm mek, Dampa bialtu MLA Pu Lalrintluanga Sailo chu zanin khan Max Super speciality hospital Delhi-ah a thi.

Dampa bialtu MLA Lalrintluanga Sailo chu MAX Super Speciality Hospital, Delhi-ah zanin (21.7.2025) khan kum 65 mi niin a thi.

Lalrintluanga Sailo hi a khawsik nasat avangin June 29, 2025 khan Delhi panpui a ni a, Max Hospital-ah hian ni khat ward-a a awm hnuah ICU-ah dahluh a ni a, Rannung seh tih hmuhchhuah a ni a. A natna hian a kal (kidney) leh a thin (liver) a khawih tawh nia hriat a ni.

• MLA Rintluanga thihna chungchangah Delhi-a cham mek Home Minister K Sapdanga hovin Delhi Mizo welfare lam ten naktukah a ruang rawn hawpui hman hram turin buaipui tul tul te an buaipui mek a, naktuka lo haw tum Home Minister pawhin Rintluanga ruang rawn zui haw tumin a lo haw hun tur pawh ruang rawn hawpui theih hun tur a ngaichang niin a sawi.

• Naktukah Thlawhnain Lengpuiah Pu Rintluanga hi rawn phurh chhoh beisei a ni. Police te NOC ti turin ICU ah an rawn lut mek a. Dar kar khat chhung vel hi a Death Certificate tihfel nan damdawiin hmunah hian hun kan la mamawh dawn a. Tunah hian a boralna damdawiin Max hospital ICU ah a la awm. Hemi hmuna certificate tihfel ngai te tih zawhah AIIMS ah phurh phei a ni ang a. Thlawhnaa phurh tura ruang sawngbawlna tih a ni ang.

Naktuk zing lam flight ah a ruang hi rawn thawn chhoh hman tum a ni e.

~ K Vena, MP (RS)

• 10:43:

Pu Rintluanga Sailo ruang chu naktuk (22.7) dar 10:30 flight-ah rawn phurh chhoh tur a ni a, dar 1:30 bawrah an lo thlen hman beisei a ni e.

Nilaini dar 12:00-ah vui a ni ang.

• 11:00 PM:

MLA Pu Lalrintluanga Sailo boral chungchanga hriattirna pawimawh

Dampa bialtu MLA Pu Lalrintluanga Sailo ruang hi Max Hospital ah tih tur tul te tihfel a nih hnuah AIIMS ah thlawhnaa phurh turin a ruang hi sawngbawl a ni ang a.Naktuk Dt 22.7.2025 Thawhlehni zing lam dar 10.30 a Delhi chhuahsan tur Indigo flight in Lengpui rawn pan chhoh pui a ni ang.

Pu Lalrintluanga Sailo boral thuah amah buaipui in Delhia cham mek Pu K.Sapdanga Home Minister,Pu Lalbiakzama Assembly Speaker,Pu Richard Lalhmangaiha MP LS,Pu Lalrinsanga Ralte MLA,Pu Jb Rualchhina Vice President BJP Mizoram,Delhi Mizo Welfare hruaitute,DRC Mizoram house leh a thawhpui te,Delhi Mizo tlawmngai thahnem tak ten a tul ang apiang an buai pui a ni.

Pu Rintluanga dam loh chungchanga min biaipui tu te leh min tawngtai pui tunte, a boral thu hriat a nih veleha min buaipui tu zawng zawng te chungah lawm thu kan sawi e.

K.Vanlalvena

Sunna: