Aizawl | July 9, 2025: Mizo Cultural Artistes Association (MCAA) te chuan zanin khan Cultural Centre cum Auditorium, Vaivakawnah an rising day vawi 27-an an hmang a, Art & Culture Minister C Lalsawivunga'n a telpui.
MCAA Rising Day lawmna inkhawm hi MCAA Vice President Lalzamlova Khiangte-in a kaihruai a, Adviser Zohmingliana'n hunserh hmangin, MCAA General Secretary Lalremhlua'n MCAA report a pe.
MCAA General Secretary report aṭanga a lan danin, Mizo Cultural Artistes' Association hi July ni 9, 1998 khan din a ni a, he pawlah hian Art & Culture Department hnuai Institute of Music and Fine Arts (IMFA) aṭanga hnam lam zirchhuakte chauh an tel thei a, tun dinhmunah MCAA-ah hian member 200 an awm mek a, Sub Headquarter pakhat - Lunglei neiin, Life member 6 an awm mek bawk. MCAA te hian, 'Ram leh hnam tan zai Ieh lam' tih thih thupuiah neiin Pathian zarah tun thleng hian chak takin a la ding zel a ni.
Khuallian C Lalsawivunga chuan, hnam ziarang leh nunphung humhima chawisan nana MCAA hnathawh ropui a tih thu a sawi a, "Tunlai khawvel changkang zelah mahni culture leh hnamzia ngaihhlut nachang hre lo an lo chhuak zel a, khawthlang mite tih dan leh ziarang kan la nasa ta hle mai a. Chutih lai chuan, Mizo kan nihna a bo ngai dawn si lo, kan thih ni thlengin eng ang pawhin inti Sap mah ila Mizo kan ni reng dawn a ni," a ti bawk.
Rising Day lawmna inkhawmah hian, IMFA 66th batch ten khuallam an entir a, 68th batch ten 'tlanglam' an entir a, 67th batch ten chheih lam leh Sarlamkai lam hmangin mipui mit an titlei bawk a. IMFA band ten mipui an awih bakah, MCAA Leithum branch leh IMFA chhuak zaithiam leh lam thiamte'n mipui an awi a ni.
MCAA President David Lalrindika pawhin kalkaawmte fuihna thu a sawi a. MCAA Finance Secretary R Lallianzuali leh Assistant General Secretary Ngursawithuami ten ralna leh sunna hun an kaihruai a, Treasurer Anne C Sanghmingthangi'n lawmthu a sawi.
Minister thusawi:
A hmasain Mizo Cultural Artistes' Association (MCAA) Rising day vawi 27-na hmang tura lo kal khawm zawng zawng chibai ka buk a che u.
Kum 1998 July ni 9-a he pawl din a nih atanga vawiin thlenga tluang taka he pawl MCAA a kal thei hi Pathian hruaina tih loh rual a ni lo. MCAA pawl ropui tak dintute, hruaitu hmasate, he pawlin tun dinhmun a thlen theihna tura tha leh zung, sum leh pai lo seng tu zawng zawngte zahna chibai ka buk a ni.
Art & Culture Department hian Mizo hnam ziarang leh tih dan te, zai leh lam te vawng him a, thangthar lo awm zel tur te tana chawinun a, khawvel mit hmuha kan hnamzia te pho chhuah hi a tum a. Hemi kawngah hian theih ang tawkin hma a la a; kum tin programme hrang hrangte buatsaih thin a ni a. Tin, kan history dik tak kan hriat theih nan pawh nasa takin hma kan la a, hmabak erawh kan ngah hle a ni.
MCAA ngei pawh hi Art & Culture hnuaia Institute of Music & Fine Arts (IMFA) a zir chhuakte intelkhawmna a ni a. Hnam lam leh zai zir chhuakte intelkhawmna pawl a lo ding hi thil lawmawm tak a ni. IMFA hnuaiah hian mi 1000 chuangin kan hnam lam, zai leh rimawi tum an lo zir chhuak tawh a, hetianga mumal taka kan hnam lam, zai, music zirna school tha leh changtlung kan nei hi thil hlu tak pawh niin ka hria. MCAA hian Mizo hnam lam leh zaite leh Mizo rimawi te humhalha chawilar hi a tum ber a ni tih te ka lo hria a, a ropui hle mai. Kan hnam thil - lam, zai leh rimawi te, kan hnam instrument te ngei pawh hi chawinun ngai leh hma sawn zel tur a ni a, hemi kawnga MCAA hmalakna hi ka ngaihlu takzet a ni.
Tunlaiah kan Mizo hnam lam dik lo tak leh kaihlek deuhthaw anga pawl thenkhat ten show neia Youtube-a an upload te hmuh tur a awm thin. A zira zir chhuak ngeiten lam dik leh style dik zawk vawng him a, mite hrilh hre tur te, kan hnam lam leh zai dal zel loh nana Art & Culture Department nena tangkawpa competition te hial buatsaih a nasa taka hma in lo la thin hi thil tha tak leh chhunzawm zel tlakah ka ngai. Tin, Mizoram hmun hrang hrang leh School hrang hrangah Mizo hnam lam leh zai zirtirin in fehchhuak bawk thin a, kan mizo culture tlawmngaihna leh aia upa zah thlengin zirtirna te in pe bawk thin. Hengte hi kan mamawh tak leh thil tangkai tak a ni, in hmalaknaah lawmthu ka hrilh a che u.
Tunlai khawvel changkang zelah mahni culture leh hnamzia ngaihhlut nachang hre lo an lo chhuak zel a, khawthlang mite tih dan leh ziarang kan la nasa ta hle mai a. Chutih lai chuan, Mizo kan nihna a bo ngai dawn si lo, kan thih ni thlengin eng ang pawhin inti Sap mah ila Mizo kan ni reng dawn a ni. Chuvangin, kan pi leh pute atanga kan inrochun, kan chin dan mawi tak tak te, kan rimawi hmanrua te, kan lam dan dangdai tak te, kan thuam mawi tak tak te leh kan hla te hi kan vawnhim tlat a tul hle a ni. Hnam dangte neih ve loh kan lam mawi danglam tak leh thuamhnaw inchawih mawi tak te hi hnam dang te hian a hmuhnawm an ti a, Mizote khawvel hriata min siam theitu kan rohlu a ni tih i hre thar leh ang u.
Art & Culture Department hian theihtawpin Mizo hnamzia humhalh a, promote zel turin hma a la zel dawn bawk a ni. Hemi kawngah, hun kal tawh a nasa taka tha in lo thawh tawh angin thawhpuiah ka sawm che u a. He pawl MCCA hi duhawm takin lo thanglianin hma lo sawn zel se la, Mizo culture vawnghimtu pawl tangkai tak lo ni zel turin duhsakna ka hlan a che u.
MCAA vul zel rawh se, ka lawm e.
[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: