Kawng chhe chungchangah NHIDCL hotu leh Central YMA hruaitute inkawm

Aizawl | July 24, 2025: Zanin (24.07.2025) dar 7:00 khan NHIDCL Director, Amarendra Kumar, tuna Mizorama cham mek chi Central YMA ah lengin Central YMA hruaitute nen an inkawm a. Director hi Adelbert Susngi, Executive Director, NHIDCL leh Pu Jonathan Lalremruata, OSD to CM ten an tawiawm.

Inkawmnaah hian Mizoram chhunga NHIDCL enkawl kawngpui, a bikin Kawnpui leh Khamrang inkar kawng chhe lutuk chungchang te leh NHIDCL hnuaia thalaite tana Skill Development Training chungchangte sawiho a ni.

Central YMA hruaitute chuan tunhnaia Mizoram chak lakna kawngpui, Kawnpui leh Khamrang inkar kawng chhe lutuk chu a siamthat hna chak taka thawk tura an beisei thu leh hemi chungchangah hian Union Minister of Road Transport & Highways Nitin Gadkari hnenah hma la tura ngenna an thawn thu an sawi bawk.

Inkawmnaah hian Central YMA hruaitute - President Lalhmachhuana, Vice President Prof. Lalnuntluanga, General Secretary Prof. Malsawmliana leh Finance Secretary MS Ralte, te an tel.