INDIA RAM VICE PRESIDENT BAN CHHAN

- K. Vanlalvena, MP (RS)

Kan hriat theuh angin India ram Vice President, Rajya Sabha Chairman ni bawk Pu Jagdeep Dhankar chuan Parliament Monsoon Session 2025 neih tan ni tak Thawhtanni tlaiah Vice President atanga banna a theh lut thut mai a nih kha. A banna theh luh lehkhaa a tarlan dan chuan a hrisel lohna avanga ama doctor thurawn anga bang ta a nih thu a sawi.

Rajya Sabha MP ka nih lai a nih ve avang nge, hetia Rajya Sabha Chairman in banna a theh lut thut mai hi a chhan hrechiang tura min beisei in min rawn zawt an awm leh thin a. A banna chhan dik tak hre pha chiah lem lo mah ila, thil kal dan tlangpui hre duhte tan he thu hi ka han thai lang ve hrim hrim ang e.

Tunkar Thawhtanni (21.7.2025) zing dar 11.00 ah Parliament Session hi Lok Sabha ah leh Rajya Sabha ah kan tan ve ve a. Rajya Sabha ah chuan Opposition Leader Pu Malikarjun Kharge-a piancham lawmpuina leh a hma ni chiah Pathianni a piancham nei MP dang pathumte piancham lawmpuina chhiar chhuah a ni a, kut kan beng dar dar a. Chumi hnuah chuan Ex-MP boral te sun nan ngawi rengin kan ding leh a, an sun zingah hian Mizoram atanga MP (RS) ni thin Pu Ronald Sapa Tlau pawh a tel ve nghe nghe.

Chumi hnuah chuan tih thin dan pangngai angin List of Business chhiar chhuah a ni a. Zero Hour a rawn intan chiah a, inauh buaina a thleng leh tan ta a ni.

Opposition MP 63 ten High Court Justice Yashwant Varma bang tura phutna _impeachment motion_ an pu lut a. Kumin March thlaah khan Justice Yashwant Varma chenna inah hian pawisa fai tam tham tak man a lo ni tawh a ni. MP thenkhatin Operation Sindhoor chungchang sawi chhuah phutin an au chiam chiam bawk a. MP thenkhatin Election Commission in E-Roll Revision a kalpui dan chungchang sawi ho an lo rawt bawk a, kan ri nuaih nuaih mai a ni.

Rei lo te hnuah, chhun dar 12.00 a tan leh turin house chu adjourned a ni a.

Chhun dar 12.00 ah house thut khawm tan a ni leh chiah tihin house adjourned leh nghal ngaiin opposition ten buaina an siam leh a, house adjourned leh rih a ni a.

High Court Justice Yashwant Varma ban tura phutna Impeachment Motion chungchang chu sawi ho turin chawhnu dar 12.30 ah Rajya Sabha Chairman chuan Business Advisory Board thutkhawm chu ama chamber ah a ko ta a.

Chawhnu dar 2.00 ah session chhunzawm leh a nihin Chairman chu a lo ding a, "High Court Justice Yashwant Varma impeachment motion notice chu MP 63 te hnen atangin ka dawng a," tih thu chu Chair atangin a rawn sawi ta a. Hun engemaw chen ri bengchheng karah sawihona hun neih hman a ni. Chairman an inthlak a, Chairman hi hahchawl turin a room ah a lut ta a.

Union Health Minister ni lai, BJP National President ni bawk, Rajya Sabha House Leader ni bawk Pu J. P. Nadda leh Parliamentary Affairs Minister nilai, Lok Sabha MP Pu Kiren Rijiju te pahnih chuan Rajya Sabha Chairman chu a room ah an va hmu nghal a, Rajya Sabha session ah Justice Varma impeachment motion a lo pawm mai chu hriatthiam harsa an tih thute, Lok Sabha ah dan pangngaia kalpui tura inbuatsaih a nih mek laia Opposition MP te ngenna pawma Rajya Sabha session a pharh a ni ta ngawt chu Prime Minister pawh a lungawi loh thu an hrilh tlang nghal a ni.

Vice President erawh chuan dan ang thlapa Business Advisory Committee kaltlanga tih a nih thuin a lo chhang thung a.

Chumi ni tlai lam dar 4.30 ah Vice President of India (Rajya Sabha Chairman) chuan Business Advisory Committee a ko nawn leh a, Union Minister pahnih Pute J. P. Nada leh Kiren Rijiju te erawh an tel duh ta lo a ni.

Chumi hnu tlai lam khawthim hmain Vice President of India Pu Jagdeep Dhankar chuan ama hrisel lohna te chhuanlamin India President hnenah a banna a thehlut ta a ni.

[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]