JCM-in Kawnpui - Sairang kawng siam tura Zoram Hnatlang koh tum an ṭhulh

Aizawl | July 24, 2025: Joint Civil Society of Mizoram (JCM)-in Kawnpui - Sairang kawng siam tura Zoram Hnatlang koh tum an ṭhulh.

JCM chuan thuchhuah siamin, "Zoram Hnatlang koh tura kan lo ruahman chu hnatlang koh a ngai rih lovin kan hria a. Hnatlang tura lo inpeih sa te, a tul anga sum leh pai, tha, hmanrua leh lirthei te thawh tura lo inkau sa zawng zawngte leh mahni awmhmun atanga rinawm taka min lo thlawp tlat tute chungah lawmthu kan sawi," an ti.

JCM thuchhuah

Joint Civil Society of Mizoram (JCM) hnuaia heng Pawl hrang hrang - Mizoram Transformation Movement (MTM), Centre for Environment and Social Justice (CESJ), Mizoram First (MF), leh Citizens Alliance for Truth and Justice (CATAJ) te

chuan July ni 21, 2025 khan Managing Director, NHIDCL hnenah, ED, NHIDCL Regional Office Aizawl kaltlangin lehkha kan thehlut a. Kan kawngpui pawimawh ber leh chak lakna, NH 306 & 06, a bik takin Kawnpui leh Sairang inkar chu siamthat hna thawk thuai tur leh hma la nghal turin kan ngen a ni. Darkar 48 chhung ngaichangin, an hmalakna a hmun ngeia kan en leh tur thu leh an hmalakna a that loh chuan Zoram Hnatlang koh kan tum tih kan puang anih kha.

Vawiin July ni 24, 2025 hian helai kawngpui hi JCM Team te chuan kan tlawh leh a, NHIDCL hmalakna te a hmunah enho a ni. Tun ni 2/3 chhung a hemi kawngpui chungchang a thil thleng leh hmalakna kan hmuh theih thenkhatte chu:

1. July ni 21, 2025-a Aizawl Press Club a Press Conference kan neih zawh mai khan Kolasib lam atangin NHIDCL hmalak nghalna leh ruahmanna te rawn sawiin, hemi ni hian Mizoram Tippers Association, Kolasib District lam hruaitute nen hetiang hian hmalak nghal a ni.

a) NHIDCL hotute ngenna angin MTA, Kolasib District lam hian lung (boulder) leh hmanraw dangte phurhna turin, an rate aia tlawm zawkin, motor 20 an ngaihtuahsak nghal.

b) Kawng siamna atana hman turin Quarry neitute hnenah an lung neih ang angte NHIDCL hnena hralh turin MTA, Kolasib District lam hian Quarry neitute an be nghal bawk.

c) Hnathawhna atana hman tur khawl lian chu Vairengte atanga lak a ngai a. A phurhna tur motor a kal theihna turin MTA leh sorkar thuneitute lam hian traffic management theihtawpin an buaipui a, khawl pawh Vairengte lam atangin Kawnpui-Sairang lamah lak nghal a ni.

2. Mizoram sorkar a thuneitute, Chief Minister Pu Lalduhoma hoa July ni 21, 2025 a thukhawm chuan Kawnpui-Sairang inkar NH 306 kawngpui chhe zual lai thawm thatna atan Rs Nuai 100 an ruahman a; kawng enkawltu NHIDCL chu kawng siam turin na zawka nawr an rel.

3. Mizoram sorkar a thuneitute chu ni 22.7.2025 khan Pu K Lalthawmmawia, Commissioner & Secretary, PWD Mizoram hovin an thukhawm a, Kawnpui leh Sairang inkar kawng chhe laite siam that thuai anih theihna tur leh hna thawh dan vil zui turin Kolasib DC kaihhruai, Joint Operation Group a din bawk.

4. NHIDCL Head Office, New Delhi lam pawhin Pu Virendra Kumar Jakhar, ED (P), NHIDCL Regional Office, Aizawl chu sawn chhuak in, a hmunah Pu Adelbert Susngi chu ED (P), NHIDCL Regional Office, Aizawl atan a rawn dah bawk (vide No. 2/NHIDCL/Posting&Transfer/2017/HR-Part(1)/E-231776/1870 of 22.7.2025).

5. NH 306 & 06 kawng chhia, motor tlan theih lohna lai hi JCM Team-te chuan vawiin July ni 24, 2025 hian a hmunah kan tlawh leh a. Adviser to CM, Pu TBC Lalvenchhunga pawhin a hmunah a lo tlawh a, motor kal theih a kawngpui siam dan tur leh hmalak zel dan tur te pawh kan sawiho a ni. Pu Robert C Lalhmangaiha DC Kolasib leh a thawhpuite nen pawh inhmu in, an hmalak dante leh ruahmanna te kan ngaithla. Tin, NHIDCL ten PWD Mizoram, MTA leh Drivers / Owners Association hrang hrangte tawiawmna leh tanpuina in, an theihtawpin hma an la tih hmuh theihin a lang. Hetiang hian tha thlah lova, hmala chhunzawm zel turin kan beisei nghal bawk a ni.

Hetiang hi thil awm dan a nih avangin Zoram Hnatlang koh tura kan lo ruahman chu hnatlang koh a ngai rih lovin kan hria a. Hnatlang tura lo inpeih sa te, a tul anga sum leh pai, tha, hmanrua leh lirthei te thawh tura lo inkau sa zawng zawngte leh mahni awmhmun atanga rinawm taka min lo thlawp tlat tute chungah lawmthu kan sawi e.

Joint Civil Society of Mizoram (JCM) chuan kum tin tun ang hun laia kawngpui kal hleihtheih loh a a awm ziah thin hi Sorkar inthlahdah vang leh remruatna fel awm loh vang niin kan ngai a. Kan kawngpui pawimawh tak, NH 306 & 06 - Mizoram 'Life Line' hi lirthei tlan theihna atana enkawl reng tur leh a siamthat hna pawh chak taka kalpui zel turin NHIDCL te kan phut tlat a. Hetiang bawk hian Mizoram hmun hrang hrang, a bikin NH 44A Darlak leh Tuidam inkar te, Mamit leh Bairabi inkarte, Mizoram chhim lam leh khawchhak lama kawngpui chhe tak takte pawh siamtha chhunzawm zel turin Mizoram Sorkar kan ngen bawk a ni.