Indian Red Cross Society-in DM&R hnenah Blanket an hlan

Aizawl | July 10, 2025: Indian Red Cross Society - Mizoram State Branch-te chuan vawiin khan Disaster Management & Rehabilitation Department hnenah Blanket 300 an hlan. Blanket inhlanna hun hi DM&R Minister chamber-ah neih niin DM&R Minister Professor Lalnilawma chuan department aiawhin a dawng a ni.

Minister chuan Red Cross Society ten Blanket an pe chu lawmawm a tih thu a sawi a; khuarel chhiatna thleng thinah te, indona avanga harsatnate leh hriselna lama buaina leh harsatna a lo thlen changtea hmatawngtu chu Red Cross Society an nih thin thu sawiin, mi harsate chhawmdawla, mipui vantlang hrisel nana thawk tu, khuarel chhiatna thleng thin leh mihring dikna chanvo inrahbehsaknate leh kawng hrang hranga chhiatna thleng thintea tanpui ngaite tanpui hna thawktu pawl an nih thu sawiin, state hrang hrangah IRCS chu an inzarpharh thu a sawi a. Mizorama Red Cross Society chawi nun leh thawmchak deuh deuh chu thil pawimawh tak a nih thu sawiin, mizo mipuite tam leh zuala IRCS member-a inpe tura a duh thu a sawi bawk.

IRCS-Mizoram State Branch Managing Committee Chairman leh Mizoram sawrkara Health Department Secretary ni bawk H Lalengmawia chuan, Indian Red Cross Society (IRCS) chu Indian Red Cross Society Act hnuaiah kum 1920 khan din a nih thu a sawi a; IRCS - Mizoram State Branch-ah hian Red Cross Society President nihna chelhtu chu Governor niin Health Department Secretary chu chairman a nih thu a sawi a. IRCS member ni tur hian a duh apiang tan a tel theih thu sawiin Life member ni duh tan membership fee Rs 500 a nih thu leh Institutional membership Rs 5000 a nih thu a sawi bawk. Mizoramah Red Cross Society hnathawh tih chak thar lehna tura hma lak mek a nih thu sawiin July ni 18-a India ram pum huap IRCS meeting, Rajtrapati Bhavana neih turah pawh Mizoram aiawhin Governor a tel tur thu a sawi bawk a ni.

Vawiina Blanket inhlanna hunah hian IRCS - Mizoram State Branch Committee Memberte bakah Disaster Management & Rehabilitation Department hotute an kalkhawm a ni.

Indian Red Cross Society – Mizoram State Branch Managing Committee Memberte:

1. H. Lalengmawia IAS, Chairman

2. Dr. Chawnglungmuana, Secretary

3. Dr. Benjamin Lalrinpuia, Jt. Secretary

4. Chinkhanmanga Thomte, Asst. Secretary

5. Zodinsanga, Asst. Secretary

6. Francis Lallawmkima, Treasurer