I TUAR HIAN I NIHNA DIKTAK A LANG

_Thilmak I Beisei Laiin_

By Rick Warren 

— July 14, 2025

“Ka unaute u, in rinna fiahna chuan chhelna a siam tih hriain, thlemna tinreng in tawh hunin lawman hlirah ngai rawh u.” Jakoba 1:2-3

Mihringte hi thingpui fe ang hi kan ni — tuisoa kan thlak phawt loh chuan a nihna diktak an hre theilo ang mai hian.

Jeremia 17:10 chuan, “Kei LALPA hi mi tin, an awm dan ang zel leh an thiltih rah ang zela pe tûra rilru en chhuaktu, thinlung fiahtu ka ni.”

Pathianin engtin nge a enchhinin an fiah che? Bible chuan, “Hrehawmna rawhtuina meiah chuan ka fiah che u a ni.” (Isaia 48:10).

Tuarna hi i nungchang enfiahnana ṭha tak a ni - i chhanlet dan aṭangin tunge i nih tih a tilang si a. Jakoba 1:2-3 chuan, "Ka unaute u, in rinna fiahna chuan chhelna a siam tih hriain, thlemna tinreng in tawh hunin lawmna hlirah ngai rawh u.”

Tuarna chuan i nihna diktak a pholang a, i chhungril awmdan thlengin a hmuhtir thei che a ni. I larna leh i hmingṭhatna chu miten i nihnaah an ngai a. I nungchang kha i nihna diktak zawk chu a ni. I tawrhlai chuan i pawnlam landan pawh thup harsa i ti ṭhin a ni.

Ka rinawm i inti a ni maithei e, tawrhna i hmachhawn lai chuan i tlahniam mai lo maw? Mi inpe tak niin i insawn maithei, nimahsela i hrehawm lai chuan tawpsan hial duhna thinlung i pu em? Rinna nei mi niin i insawi a, hrehawm i tawrhlai chuan rinna chu bansan hial i duh ṭhin em? Tawrhna i hmachhawn dan aṭang hian i rinna te, i inpekna te, i rinawmna te leh i puitlinna te teh a ni ṭhin.     

Tunah hian hun harsa tak i paItlang anih chuan, fiahna pawh a ni maithei. Pathian chuan i rilru diktak a lanna turin thil a ti ṭhin a, nimahsela amah i hnaih zel theihna tur leh amah anna kawngah i ṭhan zel theihna turin ṭanpui che a inpeih reng a ni.

Ngaihtuah zui atan

* Bible chuan tuarna hi rangkachak tihthianghlim nana an hal ṭhin nen hian a tehkhin a, rangkachak pawh i hal chuan rangkachak ni lo zawng a kang ṭhin a, a tawpah chuan rangkachak hlang a lo chhuak ṭhin a ni. Tuna i tawrhmekna aṭang hian Pathianin nangmah a bawlhhawlh laite a hal tihna a ni thei em?

* Tawrhna nasa tak i hmachhawn hunah pawh i tawpsan mai lohna turin engtin nge i inbuatsaih?

* I nunah tu nge an tuar pawha nghing ve mai mai lo? Anmahni aṭangin engnge zirtur i neih le?

*[Lettu: Sangpuia]*