I KAWNG A TLUANG EM?

_Thilmak I Beisei Laiin_

By Rick Warren 

— July 7, 2025

“Tin, thusawi a ban chuan Simona hnenah, "Li thuk lam pan la, sangha man turin in lente deng rawh," a ti a. Tin, Simonan a hnenah, "Zirtirtu, rim takin zankhuain kan bei a, engmah kan man lo va, nimahsela i thuin lente ka deng leh ang e," a ti a, a chhang a.’” Luka 5:4-5 

Luka 5 ah chuan, Simon Peter-an Isua kiangah a hlawhchham thu a sawina kan hmu a. Petera khan sangha manin ei a zawng ṭhin a, sangha mantu ṭha tak a ni. Sangha mana eizawng ni si, a hlawhchham thu Isua kianga sawi chu a harsa viau awm e, “Rim takin zankhuain kan bei a, engmah kan man lo” (Luka 5:5).

Nimahsela a chang chuan, zankhuaa len den a, man loh chang te pawh a awm ve ṭhin a ni.

Chutiang dinhmun chu i nunah a lo thlen chang a awm ṭhin em? Nangmaha a ṭha ber lai pawh hi a chang chuan a tawk zo lo, i thunun theih piahlam thil i hmachhawn chang a awm ṭhin. Sum leh pai chungchangah i thunun theih piahlam a awm a. Khawchin i thunun thei a. Heng bakah i nun nena inkungkaih i thunun theihloh tam tak a awm a ni.

I hnaah rim taka i beih hnu pawha i tih theih si loh chang a lo thlenin engtin nge i tih ang?

Pakhatna, i lawngah Isua a tel ve a ngai a ni. Kawngdanga kan sawi chuan, nitinah i thiltihnaah, i hnaah leh i rawngbawlna apiangah Isua chu a laiah i dah zel a ngai a ni. Isua chu i lawngah chuang tura i sawm anih chuan, i hnaah chuan i tihtheih piahlam a awm tih i inpawm a, Isua chu che tura i sawm a ngai a ni. Bible chuan "i kawng a tluang lo a ni tih inpawmna," chu inpuanna a ti a, a harsat chang pawh a awm ṭhin a ni.

I kawng chu a tluang lo a ni tih hi engvangin nge inpawm a harsat em em? Hengte hi a chhan tlemte te an ni:

*Chapona.* I tih theihloh chu tumah hriattir i duh lo va. Nang chu a mawh latu ah i inruat hmiah a, nangman tih vek i tum a ni. Nikhatah darkar 12 hial pawh thawh a, nangmaha engkim chinfel i tum a ni.

*Luhlulna.* I thiltih dan chu thlak danglam harsa i ti a. Hei hi i hria em, naktuka hlawhtlinna tur hmelma lian ber chu nimina hlawhtlinna kha a ni an tih hi?

*Hlauhna.* Rimtakin zankhuain len i deng a, pakhat mah i man lo tih hi inpawm harsa i ti a ni. Miin an ngainep ang che tih i hlau a ni. Isua chu i lawngah chuan tir i hlau va, a chhan chu i duhlohna lamah lawng a khalh ang tih i hlau a ni.

I kawng chu a tluang lo a ni tih inpuan hun a ni. I chapona te, i luhlulna te leh i hlauhna te paih la. Isuan i lawng a thunun theihdan leh i len khat vek khawpa a tih theihdan chu en rawh le.

Ngaihtuah zui atan

* Chapona, luhlulna leh hlauhna chu i buaipui viau em? Engvangnge?

* I nun eng berah nge i ṭhatberna pawh tawk zo lova i inhriat? I kawng chu a tluang lo a ni tih Pathian hnenah hrilh ang che.

* Nangma duhna kawng zawh lo va, Pathian kawng i zawh theihna turin engtin nge a takin i chet chhuah ang?

*[Lettu: Sangpuia]*