"Eirukna lakah kan Minister leh MLA te vawiin thlenga hminghliau an la awm lo leh India rama eirukna tlem lamah Mizoram pahnihna hial kan ni thei hi lawmawm kan ti takzet,"

Aizawl | July 3, 2025: "Eirukna lakah kan Minister leh MLA te vawiin thlenga hminghliau an la awm lo leh India rama eirukna tlem lamah Mizoram pahnihna hial kan ni thei hi lawmawm kan ti takzet," - ZPM

Vawiin khan Vanapa Hall-ah Pu Lalliansawta, President kaihhruainain ZPM General Headquarters Office Bearers meeting kan nei a. Meeting chuan party chak zawka kan kal zel dan tur leh Mizoram sawrkar hmalakna tlangpuite an thlirho a ni.

Vawiin OB meeting chuan a hnuaia Resolution-te hi lungrual takin an pawm:

1. Kum 2023 December thlaa ZPM kaihhruai Mizoram Sawrkar thar siam a nih atangin, kan ram leh hnam hmasawnna atana Sawrkar hmalakna te hi chhuanawm kan ti a, ZPM General Headquarters chuan kan thlawp tlat a ni.

2. Kuthnathawktute thawhrimna hre renga, ZPM kaihhruai Mizoram Sawrkarin a intiam ang ngeia thlai thar hlawhtling taka a lei leh loneituten an kutkawih ngei thawhrim rah an seng thei ta te hi kan lawmpui takzet a. Kum lo kal zel tur atana thlai thar lei dan tur ruahman tha zawk siam a ni zel te hi lawmawm kan ti takzet a ni.

3. ZPM kaihhruai Mizoram sawrkarin mipuite hriselna dinhmun ngaihtuah a, an hmakhua ngai taka pawisa pek lawk ngai lo (cashless) a damlo enkawlna - Mipui Health Care (Mizoram Universal Health Care Scheme - MUHCS) tha tak a duang chhuak leh hman tangkai mek a nih bakah a hlawhtlinna hmel kan hmu chho zel hi lawmawm kan ti takzet a. Dinhmun harsa zawka ding ten sum leh paia harsatna an tawh avanga inenkawlna tha an dawn ve phak loh thinna te tunah chuan reh chho zelin, anmahni sum sen ngai lo (cashless) a sawrkarin a enkawl theih tak avanga inenkawlna tha zawk an dawng thei ta hi kan lawmpui takzet a ni.

4. Sawrkar tha zawk siam a nih theih nana hmalakna hrang hrang - aikal lak tihtawp, office hun vawn dik, mumal taka sawrkar hnathawk hlawh leh bill pek chhuah a ni ta te, Sawrkar hna lak hrang hrangah party induhsak bikna awm lova Dan anga lak ṭhin a ni ta te hi lawmawm kan ti takzet a; heng te hian Sawrkar inrelbawlna mumal zawkin a kal chho zel a ni tih a tarlang a, dik tak leh tha taka kal zel turin Chief Minister Pu Lalduhoma kaihhruai Mizoram sawrkar duhsakna kan hlan.

5. Eirukna lakah kan Minister leh MLA te vawiin thlenga hminghliau an la awm lo leh India rama eirukna tlem lamah Mizoram pahnihna hial kan ni thei hi lawmawm kan ti takzet a. Eiruk tlem ber na state ni thei tura tan lak zel nise kan ti.

Lalliansawta chuan, "Hmalam panin kan kal zel a ni. Vawiina kalkhawmte hi sawrkar kan siam theih nana fatute, theihtawp chhuaha campaign te kan ni a, kan thawhrimna zawng zawngte a thlawn lo. Kuthnathawktuten a rah an tel a, sorkar hnathawkin a hun bi ah hlawh an la thei a, ram pumin kan tel mek a, chuvangin in hlu hle a ni," a ti.

Lalduhoma, Chief Minister chuan, "Kan danglam a tul a, kan kal danah fel lo lai leh tha lo lai a awm a nih pawhin; inzir zel tur leh thiam zel tura beisei kan ni. Sawrkar hnathawkte nen rim taka thawkin, ram siamṭha turin theihtawp kan chhuah a ni," a ti a.

Pu K. Sapdanga, Home Minister chuan, "Sawrkar hna lakah a thiam leh a ti tha apiang lak a ni a, transfer-posting pawh uluk taka kalpui a ni," a ti.

Pu Vanlalhlana, PWD Minister chuan, "Harsatna hrang hrang karah theihtawp chhuahin Mizoram kawngpuite tha taka siam tum a ni a, khawpui tawt lutuk tih ziaawm dante pawh ngaihtuah a ni. Kawngpui engemawzat MoRTH kuta a awm chungin, mipui tawrhna tiziaawm turin Sawrkarin mawh a la a ni," a ti bawk.