Aizawl | July 5, 2025: Myanmar rama mipui sipai ve ve - Chin National Defence Force (CNDF) leh Chinland Defense Force (CDF) Hualngoram te Myanmar ram lam Khawmawi-ah an la inkap zel a. Zokhawthar YMA ten aurinna hmangi Zokhawthar lam hawia silai kap tawh lo turin vawiin khan an au hial a ni.
An ral lehlam Khawmawi-ah CNDF leh CDF-Hualngoram te hi he thu buatsaih lai thleng hian an la inkap a. Zokhawthar-a in eng emaw zat chu silai mu in a deng fuh a, heng zingah hian branch YMA adviser te in pawh a tel - tiin Zabilianz chuan a tarlang.
He inkahna avang hian mi tam tak chu India ram lam Zokhawthar-ah an tlanlut mek a, heng mi te hi Zokhawthar YMA ten an lo buaipui mek a ni. Zokhawthar khawtlang hruaitute chuan mipui te chu Myanmar ramri hnai lama kal rih lo turin an ti bawk.
Hnamkhat sipai pawl hrang inkap mek te hian an inkar uai chhanah an inpuh tawn ve ve a, remna siam zawnga hmalak tumna an la nei lo ve ve nia a lan thu thudawnna chuan a sawi.
Tarlan tawh angin CNDF leh CDF-Hualngoram te hi tun thla ni 2 khan inkapin, CDF-Hualngoram sipai Lalliandinga chu kahhlum a ni a. An boruak sosang zelin tun thlengin an la inkap zui ta a ni.
Hetia Tiaua CDF leh CNDF te an inkah mek lai hian, sahimna zawnga Mizoram lama tlanchhiat tum mi pakhat chu Tiau lui a daikai tur chesualin tuiah a tla a.
Zokhawthar Branch YMA chuan silai mu leng karah tui tla hi an zawng mek a ni.
Tukin atangin tlai dar 2:40 thleng khan silai ri a la reh lo. Mizoramah Raltlan 1000 vel an luh belh tawh niin thu dawn a ni bawk.
Burma ram, Chin State-a mipui sipai pahnih - Chin National Defence Force (CNDF) leh Chinland Defense Force (CDF)-Hualngoram te inkahnaah hian CDF-Hualngoram sipai Lalliandinga a thi.
CNDF leh CDF te hi July 2 atang khan an inakp tan a. CDF-Hualngoram thupuangtu chuan, CNDF ten tunhma atangin an thunun bial chhungah camp an siam nia sawiin, Satawm leh Lianhna khua te drone hmanga an beih avanga he inkahna hi thleng ta niin a sawi a. CNDF lamin an sipai te zin, Tuichirh khuaa an chawlh laiin July 2 khan CDF lamin hual beta an kah avanga he inkahna hi thleng zui ta niin, an sawi ve thung.
Falam township huam chhunga Hualngoram inchuhna avanga he inkahna hi thleng niin thenkhat chuan an sawi a. Satawm, Lianhna leh Tuichirh khuaah te inkahna a thleng nia sawiin, he inkahna avang hian tualchhung mi te chu Mizoram lam Zokhawthar-ah an raltlan a, Indo-Myanmar border gate pawh Assam Rifles-in fimkhur thuah chawpchilh takin an khar ve bawk a, ramri kana school kal thin naupang te, damlo leh tar chaklo ten harsatna an tawh phah nasa hle niin a sawi bawk.
CNDF leh CDF-Hualngoram te hi ramri chungchanga an thu a inhmuh loh avangin kumin June ni 16 khan CDF hotu ten Hualngoram-ah emergency an lo puang tawh a ni.
[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: