Aizawl | July 10, 2025: BJP National Secretary for Minority Morcha leh MADC MDC ni bawk Delson Notlia chuan vawiin khan Aizawl press club-ah thuthar thehdarhtute kawmin, Chakma Autonomous District Council (CADC) leh Home Minister K Sapdanga press statement chungchang a sawifiah.
Delson Notlia chuan, "Mizoram a hian Governor-ah mi hrang hrang an lo ṭhu tawh a, Autonomous District Council (ADC) bikah hian Constitution-in thuneihna a pek angin an thuneihna an lo hmang tawh ṭhin. State Cabinet Minister lo ni tawh ten Press Conference meuh kova ADC chungchanga Governor thuthlukna an sawisel kan la hre ngai lo," a ti.
Press Statement kimchang
Sixth Schedule to the Constitution of India hnuaia hian hmarchhak State a Tribal te mahni a inrelbawlna tur Autonomous Council 10 a din a, Mizoram bik ah chuan Autonomous District Council 3 awm in- Mara, Lai leh Chakma Autonomous District Council te an ni. India Constitution chuan Mizoram Governor hnena 20 BB (Sixth Schedule) hnuaia ADC te chunga Discretionary power pe in, Mizoram Governor post lo chelh tawhte chuan he thuneihna hmang hian vawi tam tak ADC te chungah hian thutlukna an lo siam tawh ṭhin a ni.
Chakma Autonomous District Council (CADC) bik hi vanduaithlak takin political instability hi a thleng reng a. Kum 2013- 2018 inkar khan CEM panga (5) an inthlak hman a, kum 2018- 2023 inkar khan CEM panga (5) an nei leh a. 2023 atanga kumin June 2025 inkarah CEM vawi 2 an inthlak leh hman ani. CADC ah hian sawrkar ngelnghet adin theiloh avangin mipui in harsatna an tawk nasa em em a, CADC staff hlawh ringawt pawh tunah hian thla 5 dawn an pek kim theihloh an nei mek a ni.
Hetiang Politics nghetlo a awm reng avang leh sawrkar hnalak diklo tam tak a awm avangin- CADC area a Civil Society Organisation lian ber pathum 1. Central Young Chakma Association (CYCA) 2. Central Mizoram Chakma Students Union (CMCSU) leh 3. Central Chakma Mahila Samiti (CMS) te chuan 12th June, 2025 khan Mizoram Governor General V.K. Singh chu hmuin- CADC a Sawrkar suspend tur leh sawrkar hnalak diklo leh financial mismanagement chungchang chhui turin One Man Inquiry Commission din turin an ngen a, heng mite vek hian a tuk 13th June, 2025 a Mizoram Chief Minister Lalduhoma chu hmu lehin CM hnenah pawh hian ngenna an siam leh bawk a ni.
Governor hian 7th July 2025 khan ngun taka CADC mipui te ngenna a ngaituah hnuin Mizoram Governor chuan CADC chu Indian Constitution in thuneihna a pek angin Governor Rule ah thlaruk (6 Months) atan a dah ta ani. Hemi thlaruk chhung hian CADC Sorkarna ah an thil tih diklohte a awm chuan lo en a, Lawngtlai DC enkawlna hnuai a siamthat hna thawk turin thu a pe ta a ni.
Mizoram Governor thuthlukna hi CADC mipui tam zawk chuan ṭha an tih em em laiin 8th July 8, 2025 khan Mizoram sawrkar a Home Minister hna thawk mek Pu K. Sapdanga leh a hote chuan Press Conference neiin - Mizoram Governor thuthlukna chu Democracy palzut na hial a puhin- a thutlukna siam tawh sut leh tura an ngen ta mai hi- keini BJP Mizoram Pradesh chuan hriatthiam har kan ti hle a, hetiang a State khat a Constitutional lu ber kan Governor chu national media te hma a diklo taka an puhchhe ta mai hi pawi kan ti hle a ni.
December, 2024- BJP in CADC a Sawrkarna kan siam dawn khan Chief Minister leh DC&MA Minister te chuan Governor hnena- CADC chu dissolve an duh thu te thlenin, Governor rule a dah turin anlo ngen taw a. Kum khat pawh aka ral hma a, CADC a ZPM an sawrkar tir duh avanga an thu an thlak leh ta mai hi mak kan tiin, ZPM hian Corruption a inhnamhnawih te humhim a, rorelna khawl a dah luih tlat an tum ta mai hi an Party slogan nen a in hmeh lo hle ah kan ngai bawk a ni.
Mizoram a hian Governor-ah mi hrang hrang an lo ṭhu tawh a, Autonomous District Council (ADC) bikah hian Constitution-in thuneihna a pek angin an thuneihna an lo hmang tawh ṭhin. State Cabinet Ministers lo ni tawh ten Press Conference meuh kova ADC chungchanga Governor thuthlukna an sawisel kan la hre ngai lo.
BJP Mizoram chuan Governor thuthlukna hi a zahawm kan ti a, CADC area a Civil Society Organisation te duhdan ang thlap a a kalpui hi mipui zahna dik taka kan ngai a ni. BJP Mizoram Pradesh chuan corruption kan do zia lantir nan Governor hian CADC mipuite ngenna angin Inquiry Commission din se, sawrkar kalta a mi corrupt leh thil diklo ti zawng zawngte chhuitir a, a mawhphurtu te chu dan anga hrem ngei ni se tih kan duh a ni.
[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: