"Academic Session hi January - December in kal leh ni rawh se,"

Sawrkar enkawl sikul-a thawktuten thahnem ngai leh zualin zirtir țheuh ni rawh se.
Sawrkar enkawl Sikul-a common Uniform hman mek hi sikulin an duh anga kalpui leh ni rawh se.

Aizawl | July 3, 2025: Zirtirtu pawl hrang hrang 11 inzawmkhawmna - Mizoram Teachers' Federation (MTF) chuan vawiin khan Synod Conference Centre Mission Veng-ah General Conference Vawi 6-na an hmang a, School Education Minister Dr. Vanlalthlana'n khuallian niin a hmanpui.

Chawhma Programme hi MTF Joint Secretary Lalrawngbawla'n a kaihruai a, MTF General Secretary Hmingchungnunga'n 2023-25 chhunga MTF hmalakna report a pe. MTF President Rosangzuala Ralte in thu a sawi a, President pension a chhuak Laltlanliana chu ngaihhruina citation hlan a ni.

Khuallian Dr. Vanlalthlana chuan school education department in School ten kawng hrang hranga hma an sawnna tur a sawrkar hmalak tawhna leh hmachhawp mek te tar langin theihtawp a hma an lak thu a sawi.

Academic Session leh Common School Uniform hman mek thlak a tul em tih mipui ngaihdan an lakkhawm thu a tarlang a, rawtna an dawn atanga duh dan tam ber angin thutlukna an siam dawn a ni, a ti. School ram humhalhna kawngah nasa takin School Education Department in hma a la a, School a thawktuten an thawhna hmun țheuhah hemi kawngah hian tan lo la turin a ngen bawk. Tin, tunlai naupang ten YouTube an en nasat tawh em avangin hei hi a tangkai zawnga hman a nih theih nan Education Dept chuan an nun kaihruai thei tur youtube a dah turin Cartoon buaisaih mek a nih thu a sawi bawk. NAS/PARAKH - standard assessment survey ah national average kan phak lohna te tarlangin tanlak a ngai takzet tih a sawi a, zirtirtute nasa leh zuala tan la turin a ngen a ni. Class IX ah Common question hmanga exam kalpui turin ruahmanna siam mek a ni a, Second Term exam, 2025 atanga hman țan tum a nih thu a sawi. Activity based learning uar lehzuala kalpui turin School a thawktute te a ngen bawk.

Chawhnu lamah President kaihhruainain rorel a ni a. Hruaitu thar tlan a ni a, heng mi te hi MTF 2025-27 hruaitu atana thlan te chu an ni.

1. President: C Lalremruata, MISSTA

2. Gen. Secretary: JH Vanlalhuma, MSTA

3. Treasurer: Dr Lalengzami, MMSHTA.

An ni hian OB post dang chelh tur an ruat ang.

Rorelte:

1. Sawrkar enkawl sikul-a thawktuten thahnem ngai leh zualin zirtir țheuh ni rawh se.

2. Sawrkar enkawl Sikul te sawrkarin thuamțhain ngaihlu leh zual rawh se.

3. Headmaster leh Teacher Selection Grade a kum 10 awm tling tawhte tan Upgradation / Special Grade siam ni rawh se.

4. Academic Session hi January - December in kal leh ni rawh se.

5. Sawrkar School ram tun aia nasa lehzualin humhalh ni rawh se.

6. Sawrkar enkawl School a common Uniform hman mek hi sikulin an duh anga kalpui leh ni rawh se.