A hunlai a All India Radio Aizawl announcer hmingthang leh zei, huhang na, a aw mawi tak aṭanga mite ngaihzawn rawn, a sakhmel a hring a hran a hmuh an chak ṭhin- Pi Lalhmerliani Fanai a fam ta'

- C Lalṭhazuala,

(Bematuale)

Kum 1968, 1969 velah All India Radio, Aizawl, Tuikhuahtlang aṭanga tihchhuah chu a bulṭan phat aṭang a khawvel ramtin a cheng darh sarh zofate tan thil ropui leh hlu tak, mizo history a bungthar chuankaina ropui a ni ve thlawt e.

Telivision, Youtube, Snaptube, IG, Telegram, X, Whatsaap, Fb,etc...social media hrim hrim mizoram mai ni lo, khawvelin chu titak a a la hmelhriat hma, mipui nawlpui banphak a a awm hma chuan he planet "earth" a ramtin rengte ngaihthlak rawn chu radio niin King of rock 'n' roll Elvis Presley-a te, Bristish rock 'n' roll band hmingthang the beatles ho lar vanglai tak tak a an hla lar zawng zawng tilartu chu khawvel Radio service lian leh huapzau BBC, VOA etc..te an ni.

'Chutiang taka khawvel pumin radio chanchinthar te leh zaithiam zai te, mipui tan a sawtpui theih programme ṭha tak tak, Radio programme hrim hrim khawvelin a hlut lai a zofate Jerusalem Aizawl khawpui tlangsang laitak "Tuikhuahtlang" a Radio station a lo inbun ve ta rup mai chu a hunlai a mizo mipui nawlpui ten ropui an ti a, mak an ti a, radio station a thawktute, announcer te, chanchinthar puangtu 'News reader' te, Programme officer te leh nitin a mi nawlpuite luh phallohna a lut pha chin, an engineer duty leh gate vengtu thlengin ngaihsan rawn an ni a, mitinin radio station chhung chu fan/tlawh an chak a, zaithiam zai hun, a bik takin, "A ngaithlatute hlathlan(listeners' choice) rawn herchhuah hun chu zoram tlangtin a, ṭhalaite nghahhlelh ber programme a rawn ni chho ta.

'Aizawl khawpui chhunga sikul tam takin a khat tawkin radio station an intlawh chhawk zut zut ṭhin a ni.

'Zoram dung leh vang khawtin a ṭhalaite ngaihthlak rawn, Lengzem hlathlan leh fakna hlathlan puangtu(announcer)te chu mitkhatkar lekin milar an ni thei hial ta mai, Bible thianghlim a thufingte a inziak 'Sum tam tak aiin hmingṭhat hi thlan zawk tur a ni' tih chu radio announcer te chungah a rawn thleng ta, announcer te ai a hlawh tam deptt lian pui pui a hotulu, lirthei pahnih pathum kawltute aiin, politician thiltithei tak tak te aiin, Minister leh MLA te aiin an lar chho ta, an thupuan dan te, an aw 'Voice' thluk dan te chu khua zawng zawng a naupang inlemtekhual leh zan lam a pawnto ten an inzir siak ta sup sup mai a ni, radio huhang chu mizo mipuite-ah a tlana-in a thawkna ta riap riap khawp mai, kum 39 vel liam ta khawvelah kha chuan.

All India Radio announcer, VL Hrimi leh Lalhmerliani fanai te bakah a hunlai a radio artist lar tak ni tel tho Laltlanthangi pachuau te chu chutiang taka huhang na radio station, Aizawl tuikhuahtlang veng aṭanga Zofa ten a awm mawi em em leh, a bu ang thlap a programme an han khalh kual vel dan leh han chin leh kual vel dan ngaihnawm leh felfai avanga zofaleng ten an hriat hmasak leh an sakhmel an hmuchak, a hring a hran ngei a chibai an chak hmasak te an ni ngei ang'.

Dang-chih awm miah lo, a muang lai emaw a fan lai emaw awm miah lo, a thlun phelh ang par par a Lalhmerliani fanaiin, kum 1970 chawhnu lam leh 1998 hmalam, radio programme mi zawng zawngin an bengkhawn lai leh an hlut vanglai 'Lengzem hla thlan, postal deptt kaltlang ngei a Aizawl radio station a postal stamp thlengkhawm, khawtin aṭanga hlathlangtute khaw hming leh veng hming, a thlangtu hming nen hnehsawh lutuk a han puang ṭhin kha chuan he zoram, tlangram mawi tak, zaimi lungleng te chenna hi chu a nghawrnghing hneh teh a nia, chu chu mizo history-ah nghet takin a chuang reng tawh dawn.

Han ti ti kual ta zel i la, Aizawl radio huhang nat vanglai tak tak a Pathianni zing, tupawh mai an nitin hna aṭanga an chawlhni, hahchawlhni tak mai, Pathianni zing hlathlan te kha aw, karhla lam hla a cheng chhungkhat laina hnai ten zualko atan an va hmang ṭangkai ṭhin tak em, dakin lam lehkha inthawn a karhnih hnu a an lo hriat tur kha, radio hlathlan kaltlangin darkar 24 chhungin an inhrilh hriat theih phah ṭhin a nih kha mawle, khang hunlai mizoram khawvelah khan radio hlathlante kha mipui tan rimawi khawvel piah lamah an va lo ṭangkai tak em, chung mipui ten hmaih haih lo a an ngaihthlak rawn khel lo a puangtu kha Lalhmerliani leh a ṭhiante mi pahnih khat lek kha an la ni rih si, programme an chang tam si, mizoram milar berte zingah an inhlang kai lo thei lo a ni'.

A hunlai a Zoram dung leh vang a mizo naupang ten radio a kil bial laih phah ṭhinna programme pakhat, 'Naupangte hun' Pathianni chhun Dar 12:30noon a an tihchhuah ṭhin, Aizawl veng hrang hrang a sikul naupang te dramma chan leh zai te, changmal sawi te, chang sawirual sawi te mawlh mai kha aw,! khawtin a naupang ṭawng zir tir aṭanga tleirawl uaih tawh ho thlengin an va han hlut ṭhin tak em, khang programmeah te mawlh khan a lawm, phurawm tak a, naupang pual hun hman a nih tur thu leh hun rawn neitu tur sikul hming te, an veng hming te felfai tak leh aw ri mawi tak, nelawm hmel tak a rawn puang hmasa a a tawpna rawn siam leh ṭhintu Lalhmerliani Fanai hming kha mizo naupang ten an rilru a an vawn tlat nachhan, khang hunlai a media lian ber leh mite bengdawhna, Zaithiamte zai ngaihthlakna ber piah lam a, kuthnathawktute huang leh literary magazine te, hriselna lam huang te, Mi hlawhtling leh mibik, rampum hriat mi hmingṭhate kawmna te, Radio programme chungchang a a ngaithlatute zawhna leh chhanna, a hunlai a mi ten an hlut em em te, chung kan sawi zawng zawng program inchherchhuan te, a ṭan dawn a rawn puang hmasa zeltu leh a tawpkharna siam zeltu Lalhmerliani fanai kha a hunlai a CM hming aimahin a hunlai vek khan a lar zawk lawng maw? tih zawhna hi zawhna chhan har fu a ni thei ang.

Chutiang tak a mizo hnam history a bungthar keuna a a kil a lung pawimawh, Radio Aizawl announcer ropui leh hmingthang Lalhmerliani chu cancer natna nunrawn tak chuan a nunna hlu tak min laksak ta, Zofate media/Journalism lam history a chhinchhiah ni tlat tawh tur, hnam rohlu chu hnahchhawl ang a thliahin a awm ta, a chanchin erawh zofate historyah a chuang reng tawh ang.

'Mangṭha Pi Lalhmerliani fanai'

[Join WhatsApp channel for updates- https://whatsapp.com/channel/0029Vb6o6gtL8KMqnoM2JIz12 ]