YMA Inkhawmpui lian 2025 pandal sak hna ṭan

Aizawl | June 17, 2025: Sakawrdaia YMA Inkhawmpui Lian Vawi 75-na thlenna tur Pandal chu vawiin aṭangin sak hna ṭan a ni a. October 2025-a YMA Inkhawmpui Lian thlenna tur khua Sakawrdai YMA chuan vawiin khan Pandal sak hnatlang a ko a, Pandal sak hna an thawk ṭan a ni.

Pandal sak hna hi a nawlpuia thawh theih a la ni lo a, a ruh relpui tun chauh a nih avangin mi 50 vel an thawk a ni. Pandal sa thiam mi pathum rawih a ni a, an kaihhruaina hnuaiah hna thawh a ni a. June thla chhung hian a ruh relpui hi zawh hman an inbeisei a ni.

A ruh relpui siam zawh a nih hunah hnatlangpui koh tum a ni a, pandal sak hna hi tluang taka thawh theih a nih chuan September thla ral hmaa sak zawh hman an inbeisei bawk a ni.

Pandal sak hna tan ni hian Upa Hrangzika, kum 96 chu a thawk chhuak a, ani hi hnatlang zinga upa ber a ni. Bialtu MLA Lalchhandama Ralte chuan hnatlang thingpui inna tur a pe, NE Khawdungsei VCP Lalthanliana pawhin hnatlang thingpui inna tur a pe bawk a, Inkhawmpui Lian Organising Committee chuan an chungah hian lawmthu a sawi mawlh mawlh a ni.