Ni 10-na: US-in 'Operation Midnight Hammer' a duhtawk, indo zui a duh lo!

(𝘖𝘪𝘭 & 𝘨𝘢𝘴 𝘱𝘩𝘶𝘳𝘩𝘯𝘢 𝘬𝘢𝘸𝘯𝘨 𝘬𝘩𝘢𝘳𝘵𝘶 𝘐𝘳𝘢𝘯 𝘢 𝘷𝘢𝘶 𝘯𝘢𝘴𝘢, 𝘐𝘳𝘢𝘯 𝘯𝘶𝘤𝘭𝘦𝘢𝘳 𝘩𝘯𝘢 𝘵𝘢𝘸𝘱 𝘢𝘯 𝘵𝘶𝘮 𝘭𝘰)

𝓟𝓱𝓾𝓪𝓱𝓴𝓱𝓪𝔀𝓶𝓽𝓾

~ Zoa Tlau (23.6.2025 𝐳𝐢𝐧𝐠 𝐝𝐚𝐫 6:00)

Buannel Cabin

𝗜𝗿𝗮𝗻 𝗻𝗲𝗻𝗮 𝗶𝗻𝗱𝗼 𝗸𝗮𝗻 𝗱𝘂𝗵 𝗹𝗼 - 𝗨𝗦:

'Operation Midnight Hammer' beihpui thlaka Iran nuclear hmun pathum; Fordow, Natanz leh Isfahan an beih hnuin US Defence Secretary Pete Hegseth chuan Iran nena indo zui an duh loh thu a sawi. An 'mission' chu Iran ram rorêltu thlak lam a ni lo tiin, Hegseth chuan nuclear hmun tihchhiat chu an tum ber a ni a, an hlawhtling hle niin a sawi.

𝗛𝗺𝘂𝗻 𝗽𝗮𝘄𝗶𝗺𝗮𝘄𝗵 𝗛𝗼𝗿𝗺𝘂𝘇 𝘀𝘁𝗿𝗮𝗶𝘁 𝗮𝗻 𝗸𝗵𝗮𝗿:

US-in Iran 'nuclear site' beihpui a thlak ve tâk avangin, Iran hian Hormuz strait (tuipui rêk) chu USA, German, UK leh French lawng kaltlang phal lovin a khar nghal.

Hormuz strait hi khawvela strait pawimawh ber zinga mi a ni a, he tuipui rêk hian hmar lamah Iran leh chhim lamah Musandam, Oman leh UAE a daidan a, a inkârah hian luangin Persian Gulf aṭanga Arabian Sea, tuifinriat pawhna rêk a ni. A sei zawng km 167, a zau zawng km 96-39 a ni.

He tuipui rêk kaltlang hian ni tinin khawvela 'natural gas' hmun thuma ṭhena hmun khat leh oil 25% chuang thawn chhuah a ni a, a pawimawh takzet. US chuan China hnenah Iran chu Hormuz strait khar lo tura hriattir turin a ti a, China hian he strait khar hi a tuar nasa hle dawn a ni.

US Secretary of State Marco chuan Iran-in strait a khar chu a tisual viau dawn tih a sawi a, an ram ei leh bar kharpingin anmahni tawrhna tur a ni, a ti.

𝙄𝙣𝙙𝙞𝙖 𝙖 𝙣𝙜𝙝𝙖𝙬𝙣𝙜: Hormuz strait hi ni tina khawvela oil zaa sawmthum dawn lai leh 'nautral gas' thawnchhuahna lawngin a paltlang a ni a, Iran-in a dan chah avang hian India 'energy security' pawhin a tuar viau dawn niin PTI chuan a ziak.

𝗞𝗵𝗮𝗺𝗲𝗻𝗲𝗶 𝘁𝗵𝗹𝗮𝗸𝘁𝘂 𝘁𝘂𝗿 3:

Iran Supreme Leader Ayotallah Ali Khamenei chuan indona boruak sâng zelah an thah mai a inring ta deuh ni tur a ni, a thi a nih chuan a aiawh thei tur mi pathum hming a puang a. Mi te mak tih deuhin amah thlak tura an lo rin lawk deuh ṭhup a fapa hming a tel ve lo.

𝗧𝗿𝘂𝗺𝗽 𝘃𝗮𝘂𝗽𝘂𝗻𝗴 𝗮 𝗻𝗮! 𝗜𝗿𝗮𝗻 𝗻𝘂𝗰𝗹𝗲𝗮𝗿 𝗵𝗻𝗮 𝗮𝗻 𝘁𝗶𝘁𝗮𝘄𝗽 𝗱𝗮𝘄𝗻 𝗹𝗼:

Iran 'nuclear site' pathum US-in hlawhtling takin a tihchhiat thu US President hian a puanzar hnuin White House-ah thu a sawi a. Iran hian thungrulh a tum vaih chuan US chu a ngawi mai mai dawn lo tiin, Trump chuan "Muanna nge chhiatna rapthlâk an duh," a ti.

Khamenei-a aiawh Hossein Shariatmadari erawhin US force beiha Hormuz strait khar a a ṭul em em thu sawiin, Bahrain-a US Naval Fleet pawh an beih ngei tur thu a sawi a. Strait hi an khar nghal bawk.

Atomic Energy Organisation of Iran (AEOI) chuan Fordo, Isfahan leh Natanz te beih a nih hi a nemnghet a, an hmalakna erawh an tawpsan dawn loh thu an sawi.

𝗜𝗿𝗮𝗻-𝗶𝗻 𝗺𝗶𝗻 𝗯𝗲𝗶𝗵 𝗰𝗵𝘂𝗮𝗻 𝗮𝗻 𝗻𝗮 𝘃𝗶𝗮𝘂 𝗮𝗻𝗴 - 𝗝𝗗 𝗩𝗮𝗻𝗰𝗲:

US vice president chuan Iran nuclear hmun bak an bei lo tih sawiin, mipui leh sipai hmun dang beih an nih loh avangin beihletna an tawrh chuan Iran chuan an chhiatpui viau tur thu a sawi. Trump-a'n remna leh muanna siam mai tura a tih chu zawm turin Iran chu a hrilh.

US Secretary of State Marco Rubio chuan Iran chuan, "Iran hi a hranpaa bei turin ruahmanna kan siam lo, America leh America duhlâi a beih chuan thuhran," a ti.

𝗧𝗔𝗪𝗜 & 𝗡𝗔𝗪𝗜 𝗦𝗜 𝗟𝗢:

1. House Democratic Leader Hakeem Jeffries chuan Iran beih chu Trump-a kaltlang pui a ni a, House a râwn loh avangin a hnu lama a nghawng tur pawh ama mawhphurhna vek a ni, a ti a. Republican leh Democrat aṭangin Trump hian sawiseltu a nei nual a, 'US Constitution' bawhchhiatna, phalna la lo, US tan Iran a hlauhawm loh, an ti.

2. China chuan US chu a dem hle tih a sawi a, Iran nuclear buaipui chu UN International Atomic Energy Agency mithmuh leh enkawlna hnuaia awm a nih thu a sawi.

3. Dmitry Medvedev, deputy chairman, Russia Security Council chuan Russia khua leh tui tam zawkin Israel leh US chet dan an dem thu a sawi.

4. Saudi Arabia pawhin Iran beihna chu a ngaihven thu a sawi a. Turkey Foreign Minister chuan US hian boruak a ti sosang zawk dawn niin a sawi.

5. British Prime Minister Keir Starmer chuan US a thlawp thu a sawi a, Iran nuclear siamna hmun a bei chuan an programme-in ram dang a tih ralṭitna a chhawk zangkhai a beisei.

6. European Union foreign policy chief, Kaja Kallas, chuan inbiakna hmanga chinfel a ngaih thu a sawi a, Iran-in nuclear ralthuam a neih a rem loh thu a sawi.

7. United Nations Security Council chuan emergency meeting a ko a, Middle East-ah inkahhai awm thuai se an ti a, meeting-ah hian US leh Israel chet dan sawiseltu pawh an awm nual.

8. International Committee of the Red Cross hotulu chuan 'International law' hman chu duhthlanna ni lovin, zawm mâkmawh a ni, a ti.

(𝙺𝚑𝚊𝚠𝚝𝚑𝚕𝚊𝚗𝚐 𝚖𝚎𝚍𝚒𝚊 𝚑𝚛𝚊𝚗𝚐 𝚑𝚛𝚊𝚗𝚐 𝚕𝚎𝚑 𝙸𝚜𝚕𝚊𝚖𝚒𝚌 𝚋𝚎𝚑𝚌𝚑𝚑𝚊𝚗 𝚖𝚎𝚍𝚒𝚊, 𝙸𝚗𝚍𝚒𝚊 𝚕𝚊𝚖 𝚛𝚎𝚙𝚘𝚛𝚝 𝚊ṭ𝚊𝚗𝚐 𝚝𝚎𝚊 𝚕𝚊𝚔 𝚔𝚑𝚊𝚠𝚖 𝚊 𝚗𝚒 𝚎)