MUHCS zawm thar Private Hospital te tlawhtu Health Minister chuan, mipuite mamawhna hriaa hmangaihna leh rawngbawlna rilru pu chunga MUHCS an zawm chu lawmawm a tih thu a sawi

Aizawl | June 30, 2025: Vawiin khan Health & Family Welfare Minister Lalrinpuii chuan Aizawl khawpui chhunga Private Hospital hrang hrang, Mizoram Universal Health Care Scheme (MUHCS) zawm thar - Kidney 360° Superspeciality Clinic & Dialysis Centre, Bazar Bungkawn, Nazareth Hospital, Chaltlang, Nazareth Hospital, Ramhlun leh Redeem Hospital, College Vengte a tlawh.

Health Minister Lalrinpuii chuan MUHCS chu dam loh nikhuaa inenkawlna senso phurrit ni ṭhin chhawk zangkhaina tura duan a nih thu leh, hemi tihlawhtling tur hian Sawrkar hospital hrang hrangte theihtawpa thuam that chhoh mek an nih thu a sawi a. Sawrkar hospital-te’n damlo enkawl kawngah min dawl zawh loh avanga Private hospital-te an pawimawh thu sawiin, vawiina a tlawh private hospital te'n mipuite mamawhna hriaa hmangaihna leh rawngbawlna rilru pu chunga MUHCS an zawm chu lawmawm a tih thu a sawi.

Mipuite pawhin MUHCS zawmtu hospital-te sum pe lova (Cashless) inenkawl tura an pan zui zel a beisei thu a sawi a. Mipuite tana scheme tha tak mai chhawpchhuak thei tura thawktute leh sawrkar inpekna chu fakawm a tih thu a sawi a. Pensioner pangngaiin a huam loh, Central Scheme hnuaia hlawh la thawktu hrang hrangte pawhin zawm an rawn dil thu tarlangin, Sawrkar chuan a tlin tawk ang zelin dilna lutte a ngaihtuah thin tih a sawi bawk.

Kidney 360° Superspeciality Clinic & Dialysis Centre-ah hian Dialysis khum 6 a awm a, damlo 595 chu MUHCS hnuaiah cashless-in an enkawl tawh a, dialysis mamawh an tam avangin booking tih lawk a ngai a. Nazareth Hospital leh Redeem Hospital-ahte pawh General ward, Semi-cabin leh Private cabin thianghlim leh changtlung tak a awm a, heng hospital-ahte hian MUHCS-a inziaklut tawhte tan cashless in a inenkawl theih a ni.

Tun dinhmunah hian MUHCS hnuaia inziaklut tawh (beneficiaries) awm zat chu ABPMJAY 2,19,002, Mipui (Contributory Beneficiaries) 9069, Pensioner 9310 leh Sawrkar hnathawk 55470, avaiin 2,92,851 an awm tling tawh a ni.

Hospital-te hnenah hian kartin bill pek chhuah thin a ni a, June ni 24, 2025 thleng khan mi 12,917 hnenah bill Rs 15,12,17,890/- (crore 15.12) pek chhuah tawh a ni.

Minister hi Dr. Lalchhuankimi, Sr. Medical Superintendent, Civil Hospital, Aizawl, Dr. Zoramthara, Medical Superintendent, ZMC&H leh Pu K. Lalnghinglova, CFO, Mizoram Health Care Society te'n an tawiawm a ni.