Mizo Youtuber-te pualin Media Sensitization buatsaih

Aizawl | June 12, 2025: Vawiin khan Directorate of Information & Public Relations chuan Mizorama YouTubers-te pualin Social Media-a thu thar theh darh leh an thil chhuah chungchanga fimkhurna tur leh a kaihhnawih awm theite zir hona, ‘Media Sensitization for YouTubers’ chu Lianchhiari Run, I&PR Conference hall-ah a buatsaih a, he hun hi Information and Public Relations Department Director C Lalnunkima'n a kaihruai.

He hunah hian Mizoram University Department of Mass Communication HOD Prof. Irene Lalruatkimi chu Resource Person a ni a. Social media pawimawhzia a lem nena entirin tunlai khawvela YouTuber-te pawimawhzia a sawi a. YouTuber-te chu khawtlang siamtha thei tu, hnam nunzia leh mizo tawng humhalh tu an nih theih bakah sawrkar khalh ngil tu an nih theih dan te a sawi a; thu thar thehdarh tute pawimawhzia sawiin Democracy inrelbawlna banpui pawimawh tak tak zinga mi, ‘4th Pillar’ ti hiala hriat an nih thute sawiin thu thar theh darh leh thil post chungchanga fimkhurna tur thil pawimawh hriattur chi hrang hrangte a sawi bawk a ni.

Mizo YouTubers Association hi kum 2022-a din niin tunah hian Member 60 chuang an awm mek a. Vawiina hun hmanah hian Mizo YouTubers Association member thahnem tak bakah I&PR Officer leh Staff te an tel a ni.

Mizo YouTubers Association aiawhin Mizo YouTubers Association Presiden Harry Khiangte, Mani-a Chhangte (Mizo Official Channel), Vanneihthanga Vanchhawng (Mizo Special Report), Mapuia Hauhnar (FTH), Mali Hauhnar (Runmawi Executive Producer), Vanlalpianga (Vanlalpianga Official Channel) leh Mawitei (M&N Family) ten thu an sawi a. DIPR Joint Director Mina Zoliani Joute chuan lawmthu sawiin hun hi a khar a ni.