Lungleiah DAJGUA IEC Campaign kalpui dan tur sawi ho

Lunglei, 2025 Nikir thla ni 13: Sawrkar Laipui Ministry of Tribal Affairs hnuaia hnam hnuaihnung zawk leh ram leilung fa (tribal)-te dinhmun chawi kanna tur leh sawrkar scheme hrang hrang kal tlanga hma laknaa a tlabal lai thawm ṭhat leh tihchangtlunna tur ruahmanna, Prime Minister's Dharti Aaba Janatiya Gram Utkarsh Abhiyan (PM-DAJGUA) chungchang mipui hnena puanzar leh inzirtirna, IEC Campaign kalpui dan tur sawi hovin vawiin khan Lunglei District Bawrhsap Navneet Mann hovin a hna thawh pindanah line department hrang hrang ai awhte an ṭhu khawm.

DAJGUA hi Prime Minister Narendra Modi chuan October ni 2, 2024 khan India ram puma kalpui turin a hawng tawh a. Ram pum huapa he scheme chungchanga inzirtirna mipui hnena puangzar turin IEC (Information, Education & Communication) Campaign chu November ni 15 aṭanga ni 26, 2024 chhung khan lo kalpui tawh niin, tun ṭumah hian June ni 16 aṭanga ni 30, 2025 inkar chhungin IEC Campaign hi kalpui leh tur a ni a. He campaign hi Lunglei District chhunga khaw 52-ah kalpui tur niin, District Bawrhsap Pi Navneet Mann chuan hlawhtling taka kalpui a nih theih nan line department hrang hrangte chu ruahmanna felfai tak siam a, ṭha taka bawhzui turin a chah a ni.

PM-DAJGUA hnuaia hma lakna tur hian India ram pumah tribal-te chen tamna khaw 63,000 thlan chhuah niin, kum 5 chhung atan hma lakna tur sum cheng vaibelchhe 79,156 ruahman a ni a. Khaw thlan chhuahte hi Mission Antyodaya Survey, 2022 Critical Gap Report beh chhana thlan a ni a. Khaw thlan chhuah zingah hian Lunglei District-a khaw 52 telin, he'ng khuaahte hian ministry 17 hnuaia scheme 25 kal tlangin hmasawnna ruhrel siam te, ei leh bar, zirna, inkal pawhna leh inbiak pawhna leh hriselna kawnga hmasawnna hna hrang hrang te thawh a ni ang.

Written by -

C. Lalhruaitluanga, MIS

Deputy Director

DIPR