Hulhliap Core Committee-in Synod Revival Camping Centre an tlawh

Aizawl | June 4, 2025: Vawiin khan Core Committee on Hulhliap Short Stay Centre for Substance Use Disorders in Mizoram chuan ruihhlo ngaite puala ruihhlo ṭhuahfaina (detoxification) buatsaih tura ruahmanna a neihte bawhzuiin Synod Revival Camping Centre hmun an tlawh.

He hunah hian Hulhliap Core Committee hi an chairman Malsawmzuala Ralte hovin member-te leh Task Group member eng emaw zât an kal a. Synod Revival Department lam aṭangin Revival Director Rev. JC Lalramliana leh Revival Department Committee Member Rev. Lalrinnnunga ten an lo dawngsawng a, kohhran leh sorkarin thawhhona ṭha tak a nei zel thei hi lâwmawm an ti hle.

Tumdan ang chuan Hulhliap Short Stay Centre kalphung tur chu a hnuaia mi ang hi a ni ang:

1. Financial Year zulzuiin, March 2026 thleng kalpui tura ruahman a ni.

2. Enkawl hunchhung hi ni 15 aṭanga ni 20 a ni ang

3. Taksa aṭanga ruihhlo ṭhuah faina (detoxification) leh hriselna atana inenkawlna hmasa (basic health care) hmanga enkawlna pek

4. Psychological service

5. Spiritual service

6. Referral service

7. Family re-integration (chhungte nena inzawm lehna)

Nimin khan 'Core Committee on Hulhliap Short Stay Centre' chu an Chairman, MYC Chairman ni bawk Malsawmzuala Ralte kaihhruaiin MYC Office ah a vawi khat nan an ṭhukhawm. He Committee hian Ruihhlo ngaiten anmahni enkawl nana an mamawh hmasa detoxification (Ruihhlo aṭanga ṭhuah faina) leh basic health care (hriselna atâna mamawh hmasa) a ngaihtuahpui dâwn a, chumi atan chuan Sorkar Department leh tlâwmngai Pawlte he Committee ah hian an tel a, a hnuaia tarlan Task Group hrang hrang hi an din nghal bawk.

1. Task group on Medical Services

2. Task Group on Mobilization & Security

3. Task Group on Fooding

4. Task Group on Referral Services

5. Task Group on Information & Public Relations

Nimin meetingah hian hmalakna tura sum mamawh dan te ngaihtuahho nghal niin, sum mawmawhte a ṭul anga ngaihtuah tlan ni se, an ti a. He hmalâkna atana sum leh pai leh thildang hmanga tanpuina pe duh tan Committee hi a inhawng reng a. Enkawlna kalpui hun tura ruahman chu Ni 15 - Ni 20 chhûng a ni ang a, hemi hun chhûng hian Doctor leh Nurse, Damdawi leh Psychological Service mumal taka pek an ni ang a, enkawl hun chhûng a zawh hunah chhûngkua te nena inzawm leh theihna leh Rehabilitation Centre a referral te pawh ngaihtuahpui an ni ang.

May ni 26, 2025 a Social Welfare Minister Larinpuii hoa ṭhutkhawma ngaihtuah, Mizo thalai Ruihhlo avanga harsatna tawkte tana hmalak dan tur sawikhawmna aṭanga he core Committee hi din a ni.

Core Committee on Hulhliap Short Stay Centre-ah hian Social Welfare Department Director Dr Lalhriatzuali Ralte chu Member Secretary a ni a, member dangte chu ;-

1. Commissioner & Secretary, Social Welfare, Women & Child Development Department

2. Commissioner & Secretary, General Administration Department

3. Secretary, Law & Judicial Department

4. Secretary, Finance Department

5. Principal Director, Health & Family Welfare Department

6. Deputy Commissioner, Aizawl District

7. Additional Secretary, Social Welfare, Women & Child Development Department

8. Commissioner, Excise & Narcotics Department

9. Sr. Superintendent of Police, Aizawl District

10. Nodal Officer, Mental Health, Health & Family Welfare Department

11. CEO, MSD & RB, Social Welfare

12. President, Central YMA