Aizawl | June 21, 2025: Power & Electricity Department Officer te leh Mizoram Consumer Union Headquarters, Aizawl Office Bearers te chu nimin khan P&E Department Engineer-in-Chief JH Malsawma Office chamber-ah an inkawm a. Tunlai Electric Bill hma thar lakna chungchang inhrilhfiahna leh sawihona neih a ni.
Inkawmna ah hian Billing software kan hman lai mek SAP hi a tunlai (up-to-date) tawh loh bakah, tunlaia information kan duh ang min pe thei tawh lo tih sawi a ni a, hetih lai hian Central Sawrkar in RDSS Scheme hnuaiah Software changkang tak (IT/OT Sofware) mipuite mamawh information pe thei leh mipuite tan a hman awlsam tur a siam a. Hemi hmang tur hian hma lak mek a ni a, tuna kan hman lai Khawl hlui (SAP) atanga Khawl thar (IT/OT) a Consumer Data in suan (transfer) chhung a rei deuh avangin Consumer Meter Reading a hun takah lak theih a nih loh avanga Department in pawi a tih thu te sawi a ni a.
Bill reading lak tlai avanga Rate sang zawk anga mipuiin bill chawi belh nia an inhriat te, an chawi tam phah loh nan a Department-in Pro-rata hmanga Bill hun dik taka Bill angin siam rem sak an nih thu te fiah tak a inhrilhfiah a ni. Hetih lai P&E hotute chuan an hmanrua te hi khawl thil a ni a, eng emaw thil fello a awm a nih pawhin Department chuan Consumer-te complain hi tha takin lo dawngsawnga hma lak nghal zel an tum thu an sawi a. Tuna an Billing Application (PEDM Consumer App) ah hian mahni in atanga complain mai theih a nih thu te inhrilhfiah a nih bak ah P&E Officer ten rang taka App kal tlangin an harsatna te sutkian pui theih a nih thu te sawiho a ni.
Entirna: Bill reading lak tlai avangin thla hnih chhunga unit hman zat unit 300 lo ni ta se. Bill chhut dan pangngai ah chuan unit 100 hi rate hniam a bill tur a ni a, unit 200 dang hi rate sang zawka bill tur a ni. Mahse Pro-rata hmanga chhut a nih avangin thlakhat ang zela siam rem a ni a, hetiang hi a bill dan a ni.
1) 1st 30 days - Unit 100 rate hniam, unit 50 rate sang
2) 2nd 30 days - Unit 100 rate hniam, unit 50 rate sang
Hetiang hi a nih avangin thlakip a chawi dan tur anga siam vek a ni a, amaherawhchu, thla hnih bill vawikhatah a kal avangin electric bill hi a lang sang ta a ni.
Power & Electricity Department hotute leh Mizoram Consumer Union hruaitute hian a chunga mi ang hian sawihona hun tha tak an nei a, hemi bakah hian Power & Electricity Department Corporation-a in leh dan tur chungchangte sawiho tel a ni bawk. Tunah hian Power & Electricity Department hi corporation-ah lut turin hma lak zel a ni a, a bul tan nan Power & Electricity Department hi Strategic Business Unit (SBU) pathum - Generation SBU, Transmission SBU leh Distribution SBU ah then (unbundling) phawt tura hmalak a ni.
Hetianga Mizoram Consumer Union huaitute nen inpawhtlang leh inhrethiam taka inkawmhona hun neih a ni hi Power & Electricity Department chuan lawmawm a ti hle a, tun hnu zelah pawh consumer-te harsatna-te inpawhtlang taka ngaihtuahho zel turin Power & Electricity Department chu a in hawng reng a ni.
Edited by -
Admin
DIPR
• • • • • •
[Join WhatsApp channel for updates- https://whatsapp.com/channel/0029Vb66gtL8KMqnoM2JIz12 ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: