CM-in Olympic Day 2025 Run hmanpui; "infiamna hian duh thuhmun min neihtir a, thinlunga inpawhtawnna, inunaunate min neihtir thin,"

"hnam hrang, tawng hrang leh sakhaw hrang pawh ni ila, infiamna hian duh thuhmun min neihtir a, thinlunga inpawhtawnna te, inunaunate min neihtir thin a ni," - Lalduhoma

Aizawl | June 23, 2025: Mizoram Olympic Association buatsaihin tukin khan Olympic Day Run Aizawlah buatsaih a ni a. Infiammiten Sikulpuikawn, Vaivakawn leh Chanmari kawn atangin Lammual panin an kalkhawm a, Lammualah hian a kharna neiin Chief Minister Lalduhoman a telpui a, Chief Minister hi Sports Minister Lalnghinglova Hmar-in a tawiawm.

Thu a sawinaah Chief Minister chuan, International Olympic Day June ni 23 hi khawvel pumah Olympic Movement leh sports chawilarna atana hman thin a ni a. Infiamna hmanga taksa hrisel zawk nei tur leh infiamna hmanga khawvel tha zawk - inunauna, inzahtawnna, remna leh muanna, intluktlanna leh kan chenhona kawnga kan mamawhte chawilar nana hman a ni. Kan taksa hi hrisel taka a awm theih nan kan sawizawi that a ngai a, infiamna hi insawizawina tha ber pakhat a ni. Infiammite chu an taksa chauh ni lovin an rilru thlengin a hrisel thin. Tin, hnam hrang, tawng hrang leh sakhaw hrang pawh ni ila, infiamna hian duh thuhmun min neihtir a, thinlunga inpawhtawnna te, inunaunate min neihtir thin a ni, a ti.

Khawvel ram tina infiammite duhaisam chu an ram aiawha Olympic-a inlan a ni thin. India ram aiawha Olympic-a inlan thei Mizo thalai hi pahnih chiah kan la nei a. Kan thalaite zingah India aiawh thei khawpa talent nei tha tam tak kan neih kan rin avangin kum 2036 Olympic lo thleng tur khi thlir ranin kan sawrkar chuan Vision 2036 kan kalpui mek a. Kawng hrang hrangin hma kan la dawn a ni, a ti.

Olympic Day Run kharna inkhawm hi Mizoram Olympic Association President Robert Romawia Royte chuan a kaihruai a, Secretary, General V Lalzawmliana'n report pein, tun hnaia Infiamna lama Mizoram hmasawnna langsar zual te a tarlang a. National Games leh NE Games hnuhnung bera medal dawngtute hnenah lawmman semna neih a ni bawk.

Kumina Olympic Day thupui hi - "Move, Learn, Discover - Together for a better world" a ni.