BJP Mizoram President atan Dr Beichhua thlan a ni

Aizawl | June 30, 2025: Mizoram BJP chuan an party president atan Dr Beichhua an thlang.

Vawiin khan an party office-ah result hi an puang a. National RO Vanathi Srinivasan chuan result hi a puang.

Hemi bakah hian, National Council Member atan President kalchhual Vanlalhmuaka leh Phillip te an ruat a ni.

MLA ni lai President an neih hmasak ber a ni.

Vawiin 30th June, 2025 (Monday) Dar 10:00 am hian BJP Mizoram State Office Upper Republic Mipui Run ah, BJP Mizoram State President thar puanna hun neiin, he hun hi Pu Delson Notlia MDC, BJP National Minority Morcha Secretary, Returning Officer ni bawkin a kaihruai a, Pi Vanathi Srinivasan, BJP National Mahila Morcha, President, National Returning Officer ni bawkin BJP Mizoram State President thar puanna a nei a, Pu Vanlalhmuaka, State President kal chhuak ta leh Dr K Beichhua, MLA & State President thar te'n thusawina hun an nei a ni.

Pu Hmuaka chuan thusawiin, "vawiinah BJP Mizoram chuan State President thar ṭha tak mai kan han nei ta hi a lawmawm êm êm mai a, BJP chuan kalphung dang tak kan nei a, mi ṭhenkhat te'n Aizawl khawpui mi chauh President atana an lo rin ṭhin chu vawiin ah hian a nilo tih a chiang a, kan Prime Minister pawh khawpui mi nilovin, rethei tak aṭanga PM ni thei a ni," a ti.

Pu Hmuaka chuan, "Dr

K Beichhua, MLA BJP State President thar tur hi Mizoram ah Development a thlen theih nan theih tawp chhuahin kan thawhpui tur a ni a, kan Party chakna hian Mizoram Development a ken tel dawn avangin, BJP Member-te chuan lungrual taka kan thlawp a ngai a ni. BJP chuan tute mah chi leh hnam anga inthliar hranna a nei ngai lova, Sakhuana ang zawng pawhin inthliarna a nei ngai lo a ni. Congress Party ah chuan hnam hnuaihnung zawk anga lang te tan hmun ṭha a awm ngai lova, vawiinah chuan Congress Party chu an hniam tawh hle a ni. Vawiina India ram President pawh hnam hnuaihnung a ni tih kan hriat hi. BJP thil tum chu retheihna um bova, mi dang tana hnathawha, Development thlen tir hi a ni. Chuvangin Dr. K. Beichhua, MLA State President thar hi thlawp tlat turin ka sawm che u a ni," a ti bawk.

Dr K Beichhua, MLA & BJP Mizoram State President thar chuan thusawiin, "Pu Vanlalhmuaka leh State hruaitu lo ni tawhte'n a, harsatna hrang hrangte paltlanga an sut eng sa ah vawiin hian BJP Mizoram State President ka ni tur hi a lawmawm ka tih rualin ka huphurh hle mai a, President ni tur hian ka tling lo êm êm mai a, ka insit hle ani. Nimahsela Mizoram hmangaihtu BJP Party Member-te avang erawh chuan he dinhmun huphurh tak leh insit tak chungin BJP Member tha hnemngai tak leh ram hmangaihtu te avangin, President hna hi ka chelh dawn a ni," a ti.

Dr K Beichhua MLA State President chuan, "BJP hi District hrang hrangah tunah hian ṭan lak thar kan ngai êm êm a, District hrang hranga BJP Member duhawm tak takte vawiinah hian thinlung takin chibai ka buk che u a, kan District hmasawnna turin ruahmanna kan siam anga, District ṭha leh chak tak kan siam thei ngei ang tih ka ring a, vawiin aṭangin ngaihtuahna thar lo siam turin ka sawm che u a, BJP hi vawiin ah chuan Mizoram mipui te'n beiseina sang tak nen min thlir tawh avangin, lungrual tak leh thukhat vua a, kan kal a ngai a ni," a ti.

Dr K Beichhua chuan sawi chhunzawmin, "Mizoram ah mipui mamawh Development thlentir turin BJP ah kan awm a, chumi thlen theihna turin tute pawh kan pawimawh vek a ni. Vawiinah chuan Mizoram a Sorkar tawh Party te kan hre hlawm ta a, Mizoram mipui in beiseina thar kan Sorkar hrawn tawh te ah hian kan nei ta lo a ni. Chuvangin mi retheite thleng phak Sorkar, mi retheite hrethiam Sorkar, mi retheite chawikang duh tak tak tu Sorkar leh Party chu BJP hi kan ni a, Mizoram mipuite pawh vawiinah hian BJP kaltlanga Development kan hmuh theih ngeina tur leh kan tu leh fa te tana kawng sial tu kan nih na turin BJP hi zirchianga min rawn zawm ve theuh turin ka sawm bawk che u a ni," a ti bawk.

He hunah hian BJP Mizoram State aiawh a, National Council Member atan Pu Vanlalhmuaka leh Pu Philip Vanlalmawia John te chu ruat thar an ni a. He hunah hian Pu Devesh Kumar, MLC & BJP Mizoram State Prabhari pawhin thusawina hun a nei bawk.