ZUANGTUI VENGA PWD KHAWL MAN TO TAK SUAMSAM A NI

Aizawl | May 8, 2025: Nizan (7/5/2025) khan Zuangtui Veng, Aizawla PWD alkatra chhuan khawl lian chu suasam a ni a. He khawl hi hmantlak a ni tawh lo a ni. A dinhmun chu a tichhetu ten video-a an sawi ang hi a ni.

Hetianga mob rule a kal hi khawvel changkang tawh takah hian kalsan a hun tawh hle a, thil tichhe lo zawnga hmalak dan a awm ngei tur a ni. Pawisa tam tak man sawrkar thil tichhetute hian an phu tawk hremna, dan hnuaiah hmu ngei tur an ni ang.

Nikum 2024 ah Mizoram in Cyclone Remal kan tuar a, Aizawl Veng tina kan kawng pawh a chhe deuh vek emaw tih mai tur a ni. Thuneitu te'n theihtawp an chhuah a, a hmaa PWD kal dan ṭhina Thing kih a, steel tray hmanga Alkatra in chhuang leh tur chuan, kan ramngaw ten a tawrh nasat thin em avangin Hot Mix Plant, boruak chhia pe chhuak lo tur chi lei mai emaw lei thei an awm chuan hawh sak mai turin thu an ti tlu a.

Hemi denchhen hian M/s Sky Builders chuan a Hot Mix Plant lei thar Pollution Control Unit pawh chhawm nghal chu PWD te a hman tir a, Zuangtui PWD ramah dahin PWD ten kawng chhe siam nan an hmang ta a ni.

Theihtawp chhuah in PWD in kawng an siam a, 2024 Fur zawha kawng chhiat tam dan ngaihtuah chuan tun dinhmunah Aizawl khawpui chhung pawh tha lo lai a tlem tawhin, Zuangtui veng lamin an tihchhiat hma hian a vaiin 3500cum vel dawn her chhuah a ni hman a ni. Heng hi tray a in chhuanga mei pangngaia in hliau tur ni ta se Thingkung hlang awmna Tin 50 hmun vel hi ramngaw tih chhiat a ngai hial ang.

Zuangtui Local Council lam hian PWD te pawh be rawn hmasa lo leh, sawi hona awm miah lovin Hot Mix Plant bun a nih hma hauhin Pollution Control Board-ah complaint an thehlut nghal tawp a, PWD in he Hot Mix Plant hman avanga ramngaw chereu tur an vên/dan/pumpelh nasat zia te, he Hot Mix Plant hi Pollution Control Unit a awm avanga boruak hlauhawm chin pawh he khawl atanga chhuak lo tur a nih thu te leh kan khawpui kawng hrang hrangin he khawl a mamawh zia te hria a, lo hrethiam hram hram turin Local Council te chu ngen an ni a, an ni lam pawhin hrethiam takin PWD lam pawh an thawhpui thra hle a ni.

PWD lam pawhin he khawl hi Zuangtuia dah reng chi a ni lo tih hriain a dahna tur hmun hrang hrang an enkual a, insawnna hmun tur pawh en fel tawh a ni a. Ruah sur tak tak hmaa hnathawhna hun tlemte la awmah hna laklawh la awmte zawh hrama fur chhunga insawn hisap a nih mek lai leh; hna laklawh la awm, Zuangtui vengchhung main road 'Thuampui to Selesih via Zuangtui' khawih tan a nih zan chiaha Local Council leh YMA hriatpuina pawh awm lova Zuangtuia misual hawklak ten khawl an tichhe ta mai hi chu a pawi tak zet a ni. An thil tihchhiat zawng zawng hi Nuai 39.54 man hu lai a ni.

Tun dinhmunah he khawl hmang hian Ramhlun North, Ramhlun Venglai, Ramhlun South leh Ramthar ten an kawng intawm pawimawh em em 'Tlaklui to Sihpui Road' khawih mek a ni a. Hemi bakah Thuampui, Zuangtui, Muanna Veng, Leitan, Muthi, Durtlang, Selesih ten an kawng in tawm pawimawh em em mai 'Thuampui to Selesih Road' khawih mek a ni bawk. Nizana hetiang thil a thlen tak avang hian, khawl man to tihchhiat pawizia leh a titutea nghawng tha lo, hremna a thlen tur chu thu hran; fur hma chuan heng kawng hmangtu veng te hian kawng thra an nei ve hman dawn ta lova, Aizawl veng hrang hrangin kan tuar dawn a ni.

(Facebook-a Michael ZD Liana thu post darh, a ngai ang anga dahchhawn a ni.)