Aizawl | May 1, 2025: LBS Suzuki 22nd Inter Branch YMA Football Tournament 2025 chu Thawhlehni zan khan CYMA Hall, Tuikhuahtlangah CYMA president Lalhmachhuana'n a pet hawng. Pet hawnnah hian CYMA President chuan YMA hian a din tirh aṭanga tun thlengin Zofate hmasawnna tur a ngaihtuah tih a sawi.
Mizorama football inelna ngaihhlut CYMA Football hi May 6, Thawhlehni aṭangin ground pali RG Stadium, 1st Bn MAP Ground, Chite Veng Playground leh Muallungthuah te khelh a ni dawn. Tun ṭum inelnaah hian team 154 telin CYMA Football inelnaa team tel tam ber dawttu a ni.
Team 154 zinga team 69 hi Aizawl khaw chhung niin team 85 hi Aizawl khaw pawn a ni a, team 16 zetin Aizawl khaw pawn an tam zawk. Chutihrualin CYMA Football-ah Aizawl khaw pawn aṭangin Lengpui chiah an la champion a, kum 2006 hnuah inelna hi ṭum riat neih ni leh tawh mahse Aizawl khaw pawn aṭanga champion an awm tawh lo.
CYMA Football a hlu
Tun ṭum inelna hi Mizoram Football Association leh CYMA buatsaih a ni a, pawl pahnih hian CYMA Football an ngai hlu dun hle. MFA honorary secrertary Lalrengpuia chuan, "CYMA Football hlut dan hi sawi thiam a har. Champion branch ten an ngaihhlut dan leh a chak loten an lak nat dan aṭang hian a chiang berin ka hria. Talent hai chhuah kawngah he inelna hian player ṭha eng emaw zat a lo chher chhuak tawh a, hei hi a pawimawh takzet a ni," tiin a sawi a, Mizo footballer ṭhahnem tak chher chhuaktu a nih thu a sawi tel bawk.
Inelna kalphung sawi chhunzawmin Renga chuan, "Voter ID hman kan ti a, futsal-ah hlawhtling takin kan hmang tawh. YMA Football-ah kan ṭan leh a. tun chinah chuan a ṭha viauin kan hria, hun lo la kal zel turah pawh a rintlak turah kan ngai a, hma pawh kan sawn phah ka ring," tiin a sawi a, inelna hmachhawn turte chu dik taka ti turin a ngen.
Mipa tan a ṭul
CYMA president Lalhmachhuana chuan, "YMA hian kum 1935-a a din tirh aṭangin thil ṭha tam tak a lo ti tawh ṭhin. Vawiin thleng hian Zofate hmasawnna turin ke a pen a ni. YMA thil tum pathum zinga pakhat chu Zofate hmasawnna ngaihtuah a ni a, kawng hrang hrangin Zofate hmasawnna tur hi a ngaihtuah a, a thawk bawk a, a ti bawk a ni," tiin a sawi a, CYMA Football chu football lama tuimite leh chumi lama tui halte tana intuai thar lehna tur a nih thu a sawi.
Mizo mipa chungchang sawi chhunzawmin CYMA President chuan, "Voter list kan en chuan mipa aiin hmeichhia hi 25,000 chuangin an tam daih tawh. Khawiah nge mipa te hi kan tam ve le tih hi inngaihtuah chiang teh ang u. De-addiction Centre-ah chuan mipa deuh hlir, khawlaia spot kan tih leh vei vak mai mai, tih tur nei lo tlan kual mai maiah hmeichhia aiin mipa kan tam zawk bawk. Kan tamna tam zawk hi a ṭha lo lam a ni," tiin mipate a ṭha lama hmasawn a ngaih thu a sawi bawk.
Fixtures chu
LBS Suzuki neitu Lalnunthara Ngurte-in fixtures a tlangzarh. CYMA Football hi MFA leh CYMA buatsaih a ni a, technical committee-ten fixtures hi an buaipui. Tun ṭumah hian seeded 16 siam loin seeded pariat an siam a, bak zawng chu a pawt tawp. Team ṭhaa ngaihte pawh dah hran an ni lo.
Seeded pariatte chu inelna hnuhnung bera quarter finalist te an ni a, chungte chu Venghnuai, Hualngohmun, Bawngkawn, Bethlehem Vengthlang, Durtlang, Salem Veng, Khawzawl Vengthar leh Tlangnuam te an ni.
Inelna hi May 6, Thawhlehni aṭangin khelh ṭan a ni dawn. First round hi team 52 in an khel dawn a, khel tur zingah record nei ṭha ber Armed Veng bakah champion tawh Republic Veng leh team ṭha tura ngaih Kolasib College Veng, Armed Veng South, New Serchhip Chhekhnai, Zemabawk North, New Diakkawn Kolasib, Kawnpui Venglai leh Lengpui Model te pawh an tel.
Last 16 aṭangin RG Stadium-ah chauh khelh a ni ang a, May 22 - 24, 2025-ah khelh a ni ang. Final hi ruahman dan chuan May 31, Inrinni zana khelh turin ruahman a ni. Football khawmpui lian CYMA Football hi May thla chhungin khelh zawk vek a ni ang.
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: