New Delhi | May 19, 2025: Union Minister for Agriculture & Farmers Welfare and Rural Development, Shri Shivraj Singh Chouhan chuan vawiin khan Sate hrang hrang Agriculture Minister-te chu Agriculture Bhawan, New Delhi atangin Virtual meeting a neihpui a. He thutkhawmnaah hian ‘Viksit Krishi Sankalp Abhiyan’ hlawhtlin theih nana thil pawimawh hrang hrang sawi ho a ni.
Pu Chouhan chuan ‘V𝘪𝘬𝘴𝘪𝘵 K𝘳𝘪𝘴𝘩𝘪 S𝘢𝘯𝘬𝘢𝘭𝘱 A𝘣𝘩𝘪𝘺𝘢𝘯’ chu kan thlai thar chhuahte tihpun nana hmalakna pawimawh tak a nih thu tarlangin kan ram, kan lei leh kan loneitute hi kan zavaia kan intawm, kan mawhphurhna an nih thu a sawi a. Kan tum ber chu loneitute tana lo neia eizawn hi hlawkthlak taka siam, ei leh in tur hnianghnar zawka siam, food security awmtir mai bakah eitur hrisel leh tuihnai tak mipuite tana pek a nih thu a tarlang a ni.
Lo neih (Agriculture) hi India economy inghahna a nih thu sawiin India ram mipui zatve vel chu lo neia eizawng an nih thu a tarlang a. Chuvang tak chuan loneitute nitin mamawh phuhruk a nih theih nan hma kan lak zel a tul thu a sawi bawk. Thangtharte tan khawvel chenna tlak kan siam a pawimawh thu sawiin chumi kawngah state leh central sawrkar ten hma an la zel chu lawmawm a tih thu a sawi a ni.
Pu Chouhan chuan tun kum chhungah thlai chi hrang hrang - buhfai, chhangphut buh, vaimim, thlai hriak sawr chi leh thlai dang dang chhinchiahtlak tak maia thar chhuah a ni chu lawmawm a tih thu a sawi a. State hrang hrang leh an Agriculture Minister theuhte chu he hmsawnna avang hian fakawm a tih thu sawiin heta tanga hmasawn zel turin a fuih a ni.
Union Minister chuan ‘V𝘪𝘬𝘴𝘪𝘵 K𝘳𝘪𝘴𝘩𝘪 S𝘢𝘯𝘬𝘢𝘭𝘱 A𝘣𝘩𝘪𝘺𝘢𝘯’ chu kan Prime Minister, Pu Narendra Modi-a hmathlir - ‘Lab to Land’ tihhlawhtlin nana duan a nih thu tarlangin he campaign hi loneitute pui tur leh kan ramin food security a neih thei nana duan a nih thu a sawi a. State zawng zawngte chu ‘One Nation, One Agriculture, One Team’ thupui vawng theuh tura a duh thu sawiin furpui lo thlen hma ngeiin he campaign hi tihlawhtling ngei turin a chah a ni.
He campaign hnuaiah hian Ministry of Agriculture leh Indian Council of Agricultural Research (ICAR) tangkawp chuan scientists team 2,170 chu India ram pumah an thawn chhuak ang a. Heng scientists-te hian khaw hrang hrang tlawh kualin loneitute chu zirtirna pe in loneitute chu lo neih kawnga an buaina te tihkian dan tur an zirtir dawn a ni. Campaign-ah hian scientist-te chuan research-based hmanga lo neih dan tur an hriatte chu loneitute an zirtir ang a, chutih rual chuan loneitute harsatna tawh te ngaithlain chumi tihkian dan tur chu an ngaihtuah bawk ang.
Meeting-ah hian Shri Devesh Chaturvedi, Secretary of the Ministry of Agriculture, Dr. M.L. Jat, Director General of ICAR leh officials dangte an tel a ni.
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: