Aizawl | May 23, 2025: Indian Railway Catering & Tourism Corporation (IRCTC) hotute chuan Mizorama tourism ti hmasawn turin Mizoram sorkar nen an thawkho dawn tih an sawi.
Vawiina Aizawl Press Club-a chanchinbumite an kawmnaah he thu hi sawiin IRCTC hotute chuan Mizoram sorkara Tourism Department Director nen thawhdunna MoU ziah an tum thu leh, kar thar lo awm turah chuan tihfel an tum thu an sawi a. Inremna hi ziah a nih chuan hmarchhaka khual zin tam zawk an lo luh zel theihna tura mellung pawimawh tak a nih dawn thu an sawi a. Mizorama rel a lo luh huna rela ei leh in leh khualzin chinfel te, ticket buaipui te anmahni kut a nih dawn thu an sawi bawk a ni.
IRCTC hotute chuan Mizorama khualzin hruai luh mai bakah mipuite tana remchang tak tur zin theihna programme tha tak tak an neih thu an sawi a. Man man takin ram hrang hrang tlawh theihna tur tour package hrang hrang an neih thu an sawi a. Hei bakah hian Kristian sakhua vuantute tana hmun pawimawh hrang hrang Korinth, Thessalonika, Athens, Rome leh adangte tlawha an zin pui thin thu an sawi bawk a ni.
IRCTC hi Ministry of Railways hnuaia Indian Railways peng pakhat niin rail chhung leh station-a ei leh in buaipui bakah ramchhung leh ram pawna khualzin buaipui hna te an thawk a ni.
Post a Comment
He post chungchanga i ngaihdan lo sawi ve rawh: