Central YMA leh MSACS te HIV/ AIDS chungchangah inrawnkhawm

Aizawl | May 23, 2025: Central YMA hruaitute leh Mizoram State AIDS Control Society (MSACS) hotute chu vawiin ni 23.05.2025(Zirtawpni) chawhnu dar 2:00 khan Central YMA Committee Room-ah Mizorama HIV/AIDS darh zel tur venna kawngah inrawnkhawmna 'Consultative Deliberation' hun an hmang. Inrawnkhawmna hi Central YMA President Lalhmachhuana'n a kaihruai.

Lalhmachhuana chuan thusawiin, Mizoram a HIV darh zel tur venna kawngah CYMA chuan MSACS te theih tawp chhuahpui an duh thu sawiin, YMA hruaitute chu khawtlang mipuite leh puipunna ah te thusawi thin an nih angin, HIV chungchang leh kan ram dinhmun (data) te zirchianna hun an nei thei chu lawmawm a tih thu a sawi a. Ruihhlo ngaite chauh nilovin sum nei leh mi changkang deuh anga lang te zingah pawh he natna kai thei dinhmun a ding leh kai hlauhawma a nung an awm thu te sawi belhin, MSACS leh Central YMA hruaitute pawhin zanah te khawlaia mite awm dan hrechiang tura kal chhuah puiah a sawm bawk.

MSACS Project Director Dr. Jane R Ralte chuan Mizoram a HIV dinhmun te zirtirna hun hmangin, October, 1990 atanga March, 2025 thlengin mi 32,544 an awm thu a sawi a. Nikum sawrkar kum (April, 2024 atanga March, 2025) chhungin mi 2021 HIV hrik pai hmuhchhuah niin chung zinga 1302 (68.13%) chu sex atanga kai an ni a, chung zingah chuan kawppui nghet (nupa/in ngaizawng ) inkara HIV inkai an tam berin, tawn sa bawp (casual sex partner) atanga inkaiin an dawt thu leh mipa mahni anpui kawp atanga HIV inkai hi hmuhchhuah an tam zel thu a tarlang bawk a. Tin, 2024-2025 sawrkar kuma HIV hmuhchhuah zinga 83.47% chu thalai kum 15- 49 inkar te an nih thu sawi belhin hei hian HIV laka inven nana sex hman apianga condom hman ziah a pawimawhna leh kan thalaite pawh condom pai reng tura inzirtirna uar lehzual a pawimawh thu a tarlang bawk.

He zirhona ah hian ruihhlo ngaite damdawi hmanga an inchiu thin aiah a ei a ei chi (Oral Substitution Therapy - OST) damdawi pawimawhna leh ruihhlo ngaite tana a thatna te, HIV kai hlauhawma nung thin te enkawlna leh zirtirna hmun Drop In Centre veng hrang hranga kalpui mek te a nihna tur anga tha taka kalpui a nih theih nana Central YMA leh veng tina Branch YMA te nena thawh ho leh tanrual a pawimawhna te, ruihhlo ngaite uluk taka HIV chungchang te, a invenna kawngte, an ruihhlo ngaihna kawnga harsatna tam tak an tawh te tihhniam na tura uluk taka Drop In Centre kaltlanga enkawl leh zirtir a pawimawhna te sawiho a ni a.

Central YMA hruaitute chuan harsatna tam tak karah MSACS te hnathawhna a thlawn loh thu leh hmalakna tur tam tak la awm bawk mahse hmasawnna kan hmuh chhoh ve zel thu an sawi bawk.

Heng bakah hian MSACS lam hruaitute chuan HIV kai tawh mahni dinhmun inhrelote’n an dinhmun an hriat theih nana HIV test pawimawhnate Central YMA chanchinbu leh branch YMA chanchinbu kaltlang te leh YMA program hrang hrangah te uar lehzuala in zirtirna kalpui te, HIV vei mekte pawhin tha taka inenkawlna (ART) damdawi ei that a pawimawhzia chungchangte sawiho a ni bawk.