(Vice President of India chuan Kerala chu 1991 khan 'fully literate' an nih thu 2016 khan a puang)
~ Zoa Tlau,
Buannel Cabin
(23.05.2025) Zirtawpni
Chief Minister Pu Lalduhoma chuan Mizoram chu India rama ziak leh chhiar thiam vek - 'fully literate' state hmasa ber a ni tih May ni 20, 2025 khan a puang a. Mizoram University-a hun pawimawh tak neihah hian Union Education Minister of State Jayant Chaudhary pawh a tel. Mizoramah hian tun dinhmunah ziak leh chhiar thiam mihring kum 7 chunglam zaa 98.20 awm anga chhinchhiah a ni.
Mizoram aia hmasa Kerala, mahse Programme hran ve ve:
Mizoram state 'fully literate' a nihna hi ULLAS (Understanding of Lifelong Learning for All in Society) - New India Literacy Program, Central leh State ṭangkawpa hmalakna hnuaiah a ni a. Hetih lai hian kum 2016 January ni 13 khan India ram Vice-President Hamid Ansari chuan Kerala chu 'Athulyam' programme hnuaiah 18.04.1991 khan 'fully literate' ni hmasa ber a nih thu a puang tawh tih The Hindu leh national media hrang hrangin an lo ziak tawh thung. Athulyam programme-ah hian literacy 90% khûm chin kha 'fully literate' tiin an puang a ni.
Tunah 95% chin 'fully literate' a ni:
Sorkar laipui Ministry of Education chuan ziak leh chhiar thiam a tehnaah State pakhata mihring cheng zaa 95 chin ten an thiam chuan ziak leh chhiar thiam vekah a pawm a. Mizoram hi tun dinhmunah 98.20% a ni mêk niin Periodic Labour Force Survey (PLFS) chuan a chhinchhiah a, PLFS hi Ministry of Statistics and Programme Implementation hnuaia awm niin a rintlak tawk a ni.
2011 Census en lawk ang:
Rintlak leh behchhan ber chu chhiarpui (census) hi a ni a, kum 2011 kha census hnuhnung ber niin, literacy lama India state dinhmun chu hei hi a ni a. Pakhatna- Kerala 93.91%, 2-na Lakshadweep 91.85% leh 3-na Mizoram 89.86% te an ni. Kum 2021 khan census neih tur a ni a, kum 10 dana neih a ni a, Covid-19 vangin a theih loh a, tunah neih mêk niin 2026-ah tlangzarh hman an beisei.
Sorkar a fakawm, State dang engatinge:
Mizoram sorkar hmalakna a fakawm takzet a, ULLAS Programme hi India ramah kum 2022 vel aṭanga beih ṭan a ni a. Central leh State ṭangkawpa beih a ni a, tun sorkarah ziak leh chhiar zirtirtu 292 lâk an ni a, Mizorama kum upa mi 1,692 ten ziak leh chhiar an zir leh a ni.
State dang hi Ministry of Education 'benchmark 95%' khûm an awm ve tho a. Mahse Mizoram anga 'fully literate' a puan an ni lo. Mizoram 98.2%, Lakshadweep 97.3%, Nagaland 95.7% leh Kerala 95.3% te an ni.
Tlangkawmna:
Tun ṭuma ULLAS New India Literacy Program hnuaiah hian ziak leh chhiar thiam vek hmasa ber chu Mizoram a lo ni ta a. Hemi puanna hi sorkar laipui aṭangin Education Minister-in a rawn hmanpui a. Mizoram CM chuan financial leh digital literacy lam te hmachhawp a nih thu a sawi a. Digi Kerala Initiative, hmalaknain Kerala chu 2022 khan 'Total Digital Literacy' a puan a lo ni tawh bawk.
Mizoram hlawhtlinna hi internet lamah pawh an ziak nual ta bawk e. Ziak leh chhiar tehna tak tak hi chu kum 10 dana neih chhiarpui (census) hi a ni leh dawn tho a. Kan ṭan mar renga 'Census 2026' tihchhuah huna pakhatna kan nih a ngai. Sorkar, Education Minister te hmalakna a fakawm hle a ni.
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: