Aizawl | May 24, 2025: New Delhi a cham mek Chief Minister Lalduhoma leh Union Home Minister Amit Shah chu nimin khan inkawmna hun tha tak an nei.
Amit Shah chuan, "Mizoram chu India rama state ralmuang ber a ni a, a chhuanawm hle a. Remna leh muanna a awm theih nana i lo tawrh tawhna te kha ka hriatpui che a ni", tiin Chief Minister hi a lo hrilh. Hemi hriatpui nan hian Mizoram Sawrkar Flagship Programme Bana Kaih (Handholding Scheme) atana Peace Dividend inpek theih a nih leh nih loh te pawh an sawidun nghal a ni.
Assam Rifles ram chhuahsan tura building hlui man Rs. 523.04 lakh Mizoram sawrkarin a pek ve tur pawh Home Minister hian peksak a inhuam thu a lo hrilh a. Airports Authority of India (AAI) kuta Lengpui Airport hlan chungchang pawh sawiin Home Minister chuan a rang thei ang bera chinfel a tum thu a lo hrilh.
Mizoram DGP atana David Lalrinsanga, IPS, a ranglama dah a nih theih dan tur pawh an sawi.
MNF Sawrkar hunlaia Mizoram Legislative Assembly in a lo pass tawh The Mizoram Maintenance of Household Registers Bill, 2019 tun thlenga India President kuta la tang chungchang pawh an sawi a. Home Minister hian chinfelsak thuai a lo tiam a ni.
Home Minister hian Myanmar atanga raltlante chhinchhiahna tur portal Mizoram puala an siam chu peihfel a nih tawh thu a lo hrilh bawk.
Lalduhoma hian Mizo Territorial Army Battalion din a nih theihna tura a hmalakna avangin Home Minister chungah lawmthu a sawi a. Ram venhimna mai piahlamah Mizo thalaite tana hna siamtu pawimawh tak a ni, a ti. A taka kalpui a nih thuai nana Director, Intelligence Bureau nena bawh zui ngai la awm te an sawidun bawk.
• • • • • •
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: