Lawngtlai in chima tangte chhanchhuah hna thawk mek; thi leh hliam zat hria theih a la ni lo!

Lawngtlai | May 31, 2025: Tarlan tawh angin nizan 10:45 bawr vel khan Lawngtlai Bazar veng leh Chandmary veng inrina-ah lei tawlh avangin in 6 a chim a, mihring thi leh hliam engzat nge awm tih erawh hriat theih ala ni lo.

Nizan khan Lawngtlai Bazar veng leh Chandmary inrina laiah building 6, chu lei tawlh avangin a chim a. Heng in chim te hi Bazar lamah in pathum, Pi Vanlalhlupuii Fanai, Pu B. Vanhnuailiana leh Pu C. Lalchungnunga te in leh Chandmary lamah Pi C. Nihluani m/o F. Rothuama, Pu F. Rothuama (rel lai) leh Pu F. Lalnithanga (rel lai) te a ni.

Heng in chim zinga mihring cheng awm tamna ber, Pi Vanlalhlupuii building hi GDC in an luah bakah a chunglam hi Khual buk anga siam niin Burma lam an thleng tlangpui a, in chim hian mi 5-8 vel a chim hnan niin thu kan dawng. Building hnuai, kawng anah hian Home appliance dawr leh Cement dawr a awm bawk.

Nizan lam khan ruah a sur nasa a, lei hi ala chet deuh reng avangin chhanchhuah hna a thawh hleih theih thei lova, hriat theih chinah hliam tuar pakhat chu lakchhuah a ni a. Sorkar thuneitute, CYLA leh khawtlang hruaituten ngun taka an ngaihtuah hnu-ah khawl lian nena chet ngai anih avangin chet hleihtheih a ni lova, nizan zankhua khan a hmunah thuneitute, CYLA leh Veng chhung hruaituten an awm chilh a, tukin zing dar 7 atang khan chhanchhuah leh thenfai hnathawh beihpui thlak a ni a. Lawngtlai khawpui chhung veng hrang hrang atangin chhanchhuah leh hna tul apiang thawk tur hian YLA branch te bakah mi tlawmngai an kal khawm.

Heng in chimna lai hi National Highway 502A leh Lawngtlai Electric veng panna kawngpui inkar a awm a ni a, Chandmary lam atanga Electric veng panna kawng hi a chim thla deuh vek a, NH pawh hi eng lirthei mah tlan theih loh in in chim leh lei che hian a hnawh ping vek a. Heng in chim chhak lamah hi building lian leh rit tak tak 4 ala awm a, heng building te pawh hi tun dinhmunah chuan a him tawk lo hle a ni.

Kum 1992 a chhim lam leh Lawngtlai khawpuia leimin nasa takah khan helai hmun hi a chet nasatna hmun pakhat a ni a. Khata tang khan helai area-ah hian in a ding mumal lo reng a. Kum 4/5 vel kalta atang khan a lei te a chet chhunzawm tak em em loh avangin in te sa in mihring an cheng leh ngam tan chauh a ni. Chutih lai chuan kum 1999/20 bawr khan helai hmun hi a che leh deuh a, Pi Vanlalhlupuii building hi a che nasa ber pawl a ni awm e. Hun eng emawchen chu luah mumal ngam loh a a awm hnu-ah luah chhunzawm a ni ve leh a, heti hian vanduaina a thleng ta a ni.

1995 leimin thlalak

Helai area hrim hrim hi a chhak tlang, Tawngtaina Tlang leh Helipad atang hian Pialtlep ang deuhin leilung hi a in khawh thla a, a lei a ngheh loh bakah Pialtlep anga lung in khawh pawh hi lung chang a ni lem lo bawk.

- Kiddy Vanchhawng, MSR