FA Airlines-in Aizawl khawpui zauh hna emaw khawpui thar din kawngah pawh sorkar thawhpui an duh!

Aizawl | May 5, 2025: Vawiin khan Chief Minister Lalduhoma chuan a office-ah FA Airlines Managing Director Prof Fauzia AA Arshi a kawm a, Mizoram nena thawhhona tur ruahmanna an rawn neih te a sawipui.

Chief Minister hian, Cargo lama thawhhona neih hi tha ka ti a. In rawtna te chipchiar taka kan hriat hmasak a ngai a ni. Ziakin kimchang takin rawn thehlut ula a tha ang, tiin FA Airlines ten Mizoram sawrkar thawhpuia an sawmna hi a lo chhang a. Vawiin vek hian an ruahmanna te hi Commissioner Vanlaldina Fanai hnenah chipchiarin an thlen dawn a ni.

Prof Fauzia Arshi chuan, Mizoram mawi tak hi khualzin ten awlsam zawk a an tlawh theih nan te, Mizoram thar chhuah organic thlai zau zawka zawrh chhuah nan te, a tul ang zelin Aizawl khawpui zauh hna emaw khawpui thar din kawngah pawh, Mizoram sawrkar nena thawh dunna neih kan duh a. In tan sum leh pai senna tur thil a awm vak lo vang, sawrkar kha thawhpui kan duh a ni ber a, fund chu kan nei a ni, tiin Chief Minister hi a hrilh a ni.

Chief Minister hi Commissioner Vanlaldina Fanai-in a tawiawm a ni.