CM-in Railways hmalakna sawipui

Aizawl | May 2, 2025: Vawiin khan Chief Minister Lalduhoma chuan a office-a North Eastern Railway General Manager of Construction AK Chaudhary a kawm a. An hmalakna te a sawipui.

Chief Minister hian meeting a neihpui hmasaka an lo sawi tawh, Bairabi rel station tihchangtlunna hna te, Mualkhang station approach road chungchang te, Sairang station hna kal mek te leh an hmalak dang te a sawipui leh a ni.

AK Chaudhary chuan, tun tuma ka lo kal hian rel ka rawn keng a, Sairang thlengin ka rawn tlan thleng thei tawh a. Hnathawktuten chhun zan zawmin hna an thawk reng a. Kumin June thla laihawlah Commission of Railway Safety Inspection neih a ni ang. June ni 17 hnu lamah chuan hawn theiha engkim kan inpeih hman kan beisei, tiin an hnathawh tlangpui a hrilh. Nikuma Hortoki station leiminin a tihchhiat pawh chak taka an sak that leh thu a tarlang a, Bairabi station-a buhfai thlen hunbi te, unloading leh a phur chhuaktu truck lamin harsatna an tawh thin chungchangah pawh, "Hun reiloteah bungruate hian Sairang an rawn thleng thei tawh dawn a ni" a ti.

Chief Minister hi Commissioner & Secretary to CM Vanlaldina Fanai in a tawiawm a, AK Chaudhary hi NE railways hotu thahnem takin an rawn tawiawm a ni.