Central YMA -in HSLC leh HSSLC Top 10 -a Mizo tlingte Chawimawina a hlan

Aizawl | May 16, 2025: Vawiin Tomir thla ni 16, kum 2025 dar 2:00 p.m khan Central YMA buatsaihin kumin 2025-a HSLC leh HSSLC mizo zirlai top ten-a tling mi 59 chawimawina hun Central YMA Hall, Tuikhuahtlangah hman a ni. He hun hi CYMA Vice President Prof. Lalnuntluanga'n a kaihruai a. CYMA Education Sub. Committee Chairman Vanlalsawma'n hunserh hmangin, CYMA General Secretary Prof. Malsawmliana'n report pek leh kal khawmte inhmelhriatirna hun a hmang.

CYMA President Lalhmachhuana'n zirlai chawimawite lawmpuina thu a sawi a. "Mizo thalaite hi rui thle mai mai vek kan ni lo va; entawn tlak tak tak, taima leh thawk rim kan awm a. Ram leh hnam tana hmabak nei ṭha tak takte hi YMA chuan beiseina sang takin kan thlir che u a ni'a ti.

Planning Secretary Lalmalsawma Pachuau IRS in zirlaite fuihna thu sawiin "Zirlai ṭha bikte hian ram leh hnam hmangaihna rilru nen lehkha zir a ṭul a. A thiam bik ni ve pha lote tan mawhphurna kan nei a, an tan kawng kawhhmuhtu ni tur a ni a ti" Rilru put hmang dik nena an hmasawn thei tura lehkha zir turin a fuih a. Lehkhabu chhiar tam tur te, writing skill nei ṭha tura inzir zel tur te, exam ṭha taka hmachhawn dan tur inruahman ṭha nei turte, midang nena inpawhna ṭha nei thiam tur te, inthununna nei thei tur leh theih tawp chhuah turin a fuih bawk.

David R. Lalsawmtluanga, (Liando Auto Works, Ashok Leyland pawhin thutawi sawiin Central YMA-in Mizote hmakhua ngaia zirlai chawimawi phute chawimawina hun a buatsaihah ṭangkai ve theia a awm chu lawmawm a tih thu a sawi a. Zirlai chawimawite, zoram tana fahrin manhla tak ni tura hual lawk ni mekte puala hun hmannaa an tana tih theih a neih ve chhunah a lawmthu a sawi bawk. Zirlai chawimawite ṭawiawmtu an nu leh pa te an fakawm a tiin zirlaite pawh an nu leh pate chawimawi let turin a fuih.

He hunah hian zirlai 59 hnenah chawimawina thuziak leh lawmpuina tangka fai pek an ni a. HSLC ah mi 22, HSSLC (Arts)- 16, Science -11 leh Commerce ah mi 10 hnenah pek an ni.