Thli leh ruahsur vangin Aizawl leh district hrang hrangah May 30 sikul chawlh puang

Aizawl | May 30, 2025: Ruah leh thli thawk thut thei vangin fimkhur thil thu-ah Sorkarin May 30 hi District hrang hrang bawrhsap te'n an district chhungah Sikul chawlh an puang!

Ruah leh thli thawk thei avanga chhiatna thleng thei laka zirlaite him zawk nan Vawiin may 30 hi Aizawl district chhungah sikul chawlh puan a ni..

Chawlh hi Aizawl Bawrhsap Er. Lalhriatpuia IAS in a puang a, ruahsur nasa vanga leimin, lei tawlh leh lung tla a tam avang leh hetiang thleng zui mai thei a tam avangin zirlai naupang te an lo him tlan zawknan a tih a ni.

Serchhip DC Paul L Khuma pawhin Serchhip Dist chhungah ruahsur nasa vanga leimin, lei tawlh leh lung tla a tam avang leh hetiang thleng zui mai thei a tam avangin zirlai naupang te an lo him tlan zawknan vawiin May ni 30, 2025 hi Serchhip District chhunga School awm zawng zawng chawlh ni ah a puang a.

Thupek zawm lo te chu DM Act 2005 Section 51(b) hnuaiah hrem theih an nih thu a tarlang tel bawk.

Lawngtlai, Mamit, Lunglei leh Kolasib bawrhsap pawhin sikul chawlh hi an puang tawh a ni.

Tarlan tawh angin, India Meteorological Department, Regional Meteorological Centre, Guwahati leh Meteorological Centre, Aizawl-in thu a chhuah angin Assam leh a chhehvela fur ruah a thawh rualin Mizoram hmun ṭhenkhatah ruah nasa tak sur thei dinhmunah a ding mek a, thli leh tek pawh a awm theih thu khawchin thlir lawktute chuan an sawi a ni.

A bikin May 29 leh May 30 hian ruah nasa taka sur tura thlir lawk a ni.

Hetiang a nih avang hian chhiatna laka kan him theih nan chhung tinte a theih ang anga fimkhur lehzual turin Disaster Management & Rehabilitation Department chuan mipui a ngen.

Khuarel chhiatna thleng palha harsatna tawkte chuan mahni District Emergency Operation Centre (DC Office) ṭheuhte emaw a hnuaia toll free number tarlanahte hian rang taka hriattir tur a ni.

1) District Emergency Operation Centre: 1077

2) State Emergency Operation Centre: 1070/0389-2342520

3) Emergency Response Support System (ERSS): 112