"ZPM hian engkim ti theiah inngaiin an inzuar a, . . engmah an theih lohzia Mizoramin a hmu mek,"

Aizawl | April 21, 2025: MPCC President Lal Thanzara chuan vawiin khan Dampui, Mamit, Vawngawnzo, Damdiai leh Suarhliap khua te a tlawh a. Congress party mi thahnem takin an lo lawm.

MPCC President Lal Thanzara chuan, "ZPM hian engkim ti theiah inngaiin an inzuar a. Mahse, a tak takah chuan engmah an theih lohzia Mizoram in a hmu mek a, Mizoram politics inthlak danglamna bul intanna Aizawl khawpuiah Local Council inthlanah Congress an che tha ber, chu chuan Congress party tho leh vat tura mipuiin an duhzia a lantir a ni," a ti.

Lal Thanzara chuan, ZPM party-in a intiam angin phur takin kuthnathawktuten Sawhthing an ching a, mahse rilru nâ in an awm hi pawi ka ti takzet. MNF sorkarah Kuthnathawktute mangang in Chemtum nen Aizawl khawpuiah kawng an zawh a, tun ZPM sorkarah pawh hian Kuthnathawktute rilru na leh mangang hian rapthlak takin lungawi lohna kawng an zawh a thlen hlauhawm khawpin an rilru a na a ni, a ti.

ZPM leh MNF sorkar hnuaiah Mizoramin manganna nasa tak a tawk a. Congress a sorkar chuan Mizoram ah thlarau malsawm hlimna a thleng a, Mizoram a him a ni. Kan Ram kan Hnam a him hi a pawimawh ber a ni tih sawiin Lal Thanzara chuan, Congress sorkarah Sakhaw Zalenna a thleng a, hnam hnufual leh tlem zawkte an him thin. Tunah hian Congress party chu Central-ah Congress kaihhruai sorkar a ding thei reng tawh. Mizoram ah pawh sorkarah mipui beiseina a hniam sawt em avangin kum 2028 hma hian inthlan that mai pawh a tul ang tih a sawi theih loh, a ti.

Kalphung thar sorkar hnuaiah Mipuiah Sum lengvak a tlem em em, ruihhlo a hluar a, chanchin thar chhiar leh ngaihthlak hrehawm khawpin kan rama thil thleng tha lo a tam. Congress party a sorkar loh chuan ram a him lo a ni.

Lal Thanzara chuan Congress a sorkar chuan NLUP changtlung zawk hmangin Mizoram mipuiin hlim takin hmasawnna kawng an zawh leh ang a, kan ram a him leh ang, a ti bawk.

MPCC President Lal Thanzara hi MPCC Secretary - Albert Lalthlamuana, Samuel Lalvawng, R Lalhmingmawia, Hosana Khiangte leh Zothanpara bakah MPCC Executive Member Lalremruata leh Lalpekkima ten an tawiawm a ni.