# Raltlante an vengchhungah sumdawn phal lo.
# Raltlan awm belh phal tawh lo.
# In luah tur nei ten Raltlan in luahtir tawh loh
Aizawl | April 29, 2025: Aizawl Tuithiang Veng Local Council leh All NGO bul tumin April 24, 2025 zan dar 8:00 khan Tuithiang Veng YMA Hall ah Tuithiang Veng chhunga Myanmar raltlante leh raltlanten in an luah neitute koh khawmna neih a ni a. He hunah hian Tuithiang Veng chhunga raltlan awmte chuan Tuithiang Veng khawtlanga an tih tur leh mawhphurhna tha taka hlen turin uar takin an chah.
YMA Tuithiang Branch President SH Lalropuia kaihhruaina hnuaia Tuithiang Veng chhunga raltlan kohkhawmnaah hian veng chhunga raltlan chhawngkaw 32 atangin damlohna avanga kal thei lote tiam lovin raltlan mi 67 te an kal khawm a, kohkhawm laia kal lo chu veng chhung atanga hnawhchhuah an ni dawn a ni.
He huna thusawitu, Tuithiang Veng Local Council Chairman Zohmingliana chuan, India ram chuan raltlan (refugee) lo dawn sawn leh ṭanpuina pek kawnga UN Refugee Convention, 1951 leh 1967 Refugee Protocol-te pawmpuitu ram, signatory country a ni ve lo a. Hetiang a nih avang hian refugee te inenkawlna tak tak a awm thei lo va. India ram danah chuan ,ramdang atanga India rama lo lut chu dan lo anga India ram chhunga lo luta ngaiin a thawn let thin. India danpui ang chuan Myanmar kan unaute thawn let tur a nih laiin Mizoram sorkar chuan a kuangkuaha, kan theih tawpin kan unaute kan chhawmdawl zawk a ni, a ti a.
Veng chhunga raltlan awm, naupai kan awm a nih chuan Sub Centre-ah in report tur a ni a, naupang kum thum hnuai lam chu vaccine lak ngei tur a ni, a ti bawk Veng chhung inrelbawlna kawngah ralltlanten kan khawtlang dan min zawm sak hram turin kan ngen a che u. Local council chuan sumdawnna inkhawih ka remti dawn lo, hemi kawngah kan dan min zawm sak ang che u, a ti bawk.
Tuithiang Branch YMA Vice President Vanlalthlana pawhin thusawiin, Pathian hian zofate tan hian thiltum a nei niin kan ngai thin a, buaina avangin Zofa chhak leh thlang atangin kan han haw khawm ta tak tak a, Pathian remruat nia kan hriatah hian kan la inbuatsaih tak tak thei lo niin a hriat, inngeih thei kan ni ang em, ngeih theih kan ni em tih hi kan in zawh a ngai hle. Tuna kan lan danah hi chuan hruaikhawm tlak kan la ni lo em aw tih hi kan ngaihtuah a ngai hle, a ti a.
Rambuai avangin rammu in ram an raldo an awm. Sahima turin ralltlan nu nau, pitar leh putar kan dawng sawng dawn emaw tih laiin thalai kan dawng sawng nasa che u. Raltlan thalai zawkte chuan ram tan in bei zawk tur a ni, a ti.
Khua leh tui diktakte pawhin kan veng chhunga an rawn pem luh dawnin pem leh kha kan phut a, nangni chu in hming chauh hriat kan phut. Hetiang karah hian ruihhlo zuar in awm kan duh lo, a ti a. Helai khawtual mite kan sual tawh nen, sualna lam min rawn belhchhah teh suh u, nangni tal hi chuan that chhuah ang che u, a ti bawk.
Tin, Mizo kan nih chuan mawhphurhna kan nei, khawtlangah chhiatni thatniaa thlan laihte, mithi lumennaah kalte leh veng chhung hnatlangah te hian raltlan kan hmu tlem che u a, hengah hian lo tel ve ula, rawn in titatu rawh u, tia sawiin, Mizo chu. Mizo, foreigner chu foreigner ni sela, khua leh tuite chanvo chu i chuhpui lo ang u, tiin a sawi.
Hei bakah hian thusawitu dangten Raltlante hnenah, raltlan an nih chhung chuan veng chhungah In leh lo neih ve talh tum lo turte, India ram khua leh tui dik takte chauhin an neih theih tur document hrang hrang ve talh tum lo turin an sawi.
Tuithiang Veng Local Council leh All NGO chuan ratlante zawm ngei tur hetiang thuchhuah an siam -
1. Tuithiang Vengchhunga Raltlante vengchhungah sumdawn phal a ni lo.
2. Raltlan ten khawtlanga an tih tur leh an mawhphurhna tha takin an hlen tur a ni.
3. Tuna Raltlan vengchhunga awmsa te tih loh chu Tuithiang Vengchhungah awm phal a ni tawh lo.
4. Local Council leh All NGO te duhdan Tuithiang Venga Raltlan awm zawng zawngten an zawm tur a ni.
5. In luah tur nei ten Raltlan in luahtir tawh loh ni se.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: