𝐙𝐏𝐌 𝐒𝐚𝐰𝐫𝐤𝐚𝐫 𝐡𝐧𝐞𝐧𝐚 𝐓𝐡𝐮𝐫𝐚𝐰𝐧: ATL Kawngpui dan tum chungchangah min zuam sual ang e!

(ATL Kawngpui dan tum chungchangah min zuam sual ang e!)

- Lalremliana Pachuau

A vawi khat nâna sawrkarna rawn siam ta chuan, Lunglei mipuite nihna in rawn hre lo nasa hle mai. Lunglei mipuite ṭanrualna avangin Municipal inthlanah hnehna in chang a. Inthlanpuiah pawh hnehna in chang chho ta zel a nih kha. Lunglei mipuite avanga inthlana hnehna in chan dan hi, in ngaihlu lo ngawt mai!

Ministry dang ang lo takin, Lunglei aṭangin Cabinet Minister pakhat bak min han pe duh lo phawt a. Chu mai ni lovin, HPC Vice Chairman leh MYC Chairman ruat kawngah theihtawpa muang luiin, nawr kal chawp ngaiin HPC VC min ruatsak a. MYC Chairman nihna min chhuhsak thung!

A hmingin Lungleiah Cabinet Meeting in huaihawt kha, kan tâna hlawkna pakhatmah a awm loh avangin kan ngaihlu teh chiam lo a, rawn meeting buai duh tawh lo mah ula a pawi lo ang. Tichuan, Congress leh MNF Ministry hnuaia englai pawha kawngpui chhe reng, Thenzawl to Lunglei kawngpui siam nân, cheng vaibelchhe 90.69 a awm ta a, kan lawm hle.

)2022-a ATL Road dinhmun:

https://www.exploremizoram.com/2022/07/lunglei-to-aizawl-road-via-thenzawl.html )

Mahse, PWD Minister kan neih tawh azawnga chak lo ber chuan, vaibelchhe 45 zet chu Aizawl khaw chhûng kawngpui siam nân, ATL Road siam nân liau liaua sum dah ni si chu min han pawhpensak ta a. Thenzawl aṭanga Lunglei kawngpui siamna tur ni na ná nâ, Pukpui leh Mausen inkâr kawng chhia chin chiah min siamsak in han tum ta a!

Hei bak baka intham lohna, inhmuhsitna, inngaih pawimawh lohna a awm thei tawh chuang lo! Chuvang tak chuan a ni, MZP kaihhruaina hnuaiah he inhmuhsitna duh loh lantir nân, Aizawl to Pukpui kawngpui chu dan a ni dâwn ta a nih hi. In rin aiin kan peih reiin, kan nawrh tawh vek chuan kan ban mai mai ngai lohzia in hre mai ang!

Ṭha te tea kan ngen lai che u hian, ṭha zaiin min dawr ula a ṭha mai tur a nia. Mahse, thutlukna kan siam tawh kan ti danglam dâwn lo min tihsak ta si a. Keini Lunglei mipui pawhin kan tih tur kan ti ve mai a ni ang chu! Lunglei mipuite ṭanrual hun a ni e. Heti êma min tham lo, min ngai hniamtu sawrkar hi, i beng harh mawlh ang u!

- https://hringchan.blogspot.com/

(April 26, 2025-a Facebook-a a thuziak lakchhawn a ni.)