Pro Volleyball: Inkhel hmasa ber tur TNT vs Tuichangral

Aizawl | April 23, 2025: EverHome Pro Volleyball League inkhel hmasa berah Thutak Nunpuitu Team leh Tuichangral an innuai dawn.

April 29, kar leh thawhlehni zan dar 8-ah LPS Arena, Falkland-ah tan a ni dawn a, nilaini tlaiah Mizoram Volleyball Association President Dr Lalmalsawma Nghaka chuan fixture tlangzarhin, league hawn nan rin hlawh pahnih TNT leh Tuichangral an inkhel ang.

Season kal mekah Pro Division inelna tum hnihbuatsaih a ni tawh a, a hmasa zawk Invitation Cup-ah Tuichangral an champion a, thla liam ta khan MVA Cup-ah TNT an champion ve thung.

October khan anmahni buzawl Muanna Vengah TNT-in Invitation Cup an thleng a, set thum faiin Tuichangral lakah an tlawm a, final an lut phah lo. Mahse, hma an sawn tih MVA Cup-ah an lantir a, Tuichangral nen vawi hnih inkhelin 3-1 ve vein an chak.

Mipa team paruk an inel dawn a, zan hnihna April 30-ah champion lai Hunthar leh Khawbel an inkhel ang a, May 1-ah Pro Volleyball-a champion hmasa ber Anastasia Electric Veng leh Sihphir inkhelin league round hmasa ber a zo ang.

Hmeichhia team pathum an inel dawn bawk a, May 13-ah league tanin a zawna vawi thum champion tumin Lungmualin bul an tan dawn a, Bungkawn nen an inkhel ang. May 15-ah team thar Jimmy Kanan an inlan ve thung dawn a, Bungkawn nen an inkhel dawn a ni.

May 17-ah mipa league khel zovin May 19-ah hmeichhe league khelh zawh a ni ve thung ang. May 20 leh 21-ah mipa semifinal neih a ni ang a, May 23-ah hmeichhia final-in May 24-ah mipa final hmangin EverHome Pro Volleyball League hmawrbawk a ni dawn a ni.