- Michael Lalmanzuala
Pope Francis thih thu chuan khawvel a chiah hneh hle a. A thih chhan hi, ‘stroke’, a hnu lawka ‘heart failure’-ina a zui tak a nih thu Vatican thupuangtu chuan a sawi.
A thih thu hriat a nih aṭangin khawvel hmun hrang hrangah mi tam takin a tana ṭawngṭai hun an hmang a. St. Peter’s Basilica panin mi a sang têlin an kal nghal bawk a ni.
A ruang hi a chênna in Casa Santa Marta-ah dah a ni rih a. Nilaini hian St.Peter’s Basilica-ah dah a ni ang a. Inrinni zing dar 10-ah vûi a ni ang a. A ruang chu St. Mary Major Basilica-ah phûm a ni thung ang. Hei hi Pope Francis-an Mari a ngaihsanzia leh rawng a bawl chhunga inkaihhruai nana a hman fo ṭhin thu lanchianna a ni. Vatican pâwna Pope phûm hmasak ber a ni ang.
Pope phûmna kuang hi Pope dang kuang, “cypress, lead, leh oak” chhawng thuma thuah ṭhin ang lova, a duh dan a lo sawi tawh anga, thing kuang pangngaia siam mangmawl hman a ni ang a; lungrem ni lo, leia innghat a ni ang. “Franciscu” tih ziak chauh a awm dawn bawk ang. Hei hian mangmawl taka thil tih leh a ṭhazawnga inthlak danglam a duh thu a sawi tawh ṭhin lanchianna a ni bawk.
Pope Francis hian hetiang hian thurochhiah a lo siam a ni. ‘Min hmangaiha min ṭawngṭaisak fo ṭhinte chu, Pathianin an phû tawk lawmman pe se; Ka thih dawn hnaiha tawrhna nasa tak ka neihte chu khawvela muanna a lo awm nan leh mitin an lo inunau ṭhat theih nan Pathian hnenah ka hlan a ni.
Pope Francis kha mihringte hi Pathian fate vek, in ang vek kan ni titu a ni a. Khawi ramah pawh khawi hmunah pawh kan awm thei titu a ni. American-ten pêmkhawm(immigrants) an ngai thei lo hle te khu dik a ti lo va. Inthlan hma khan, Trump-a leh Kamala Harris te kha, ‘immigrants’ duhlotu ve ve an nih hriain, Ṭhalo ve ve-a ṭha zawk thlang turin(the better between two evils) American-te chu a chah hial a ni.
’
Ram hruaitu ropui, Film Star lâr leh mi narân kan tihte aṭangin ngaihsan thu leh ui thu a rawn chhuak zut zut mai a ni. A vûina-a an kal tur thu an rawn sawi nghal sup sup mai a ni. Ngaihsan hlawh tak, Pope John Paul II vuina-ah khan mi maktaduai chuang an kal a. Pope Francis vuina-ah hian chu aia tam an kal ngêi rin a ni.
Sakhaw hrang hrang, Protestant, Orthodox, Muslim, Jew hruaituten inunautawn a duh thu a sawi nawn fo chu an ngaihsanna tak a nih thu an sawi a.
Whoopy Goldberg chuan Pope Francis vawi hnih hmuhna hun a lo neih tawh vanga lawmthu sawiin Pope Francis hmangaihna chu, ringtu leh ringlotute pawh Krista hmangaihnain a tuam vek ang a ni, a ti a.
Leonardo DiCaprio pawhin Pope Francis chu sik leh sa, boruak, ramngaw(environment) humhalhna lama thawh hlâwk tak a nih thu a sawi bawk.
Bishop Jorge García Cuerva chuan, “Pope Francis chu hnam tin chi tin Pope a ni a. Mi zawng zawng tan hmun a awm vek tur a ni” tih thu hi vawi sang tam a sawi a ti.
A ngaihdan ṭawmpui lem lotu, Argentine President Javier Milei pawhin an inhriat thiam lohnate chu a zauzia ngaihtuah chuan thil hotê a ni, a ti mai a ni.
Vawiin hian Cardinal-te chu Pope Francis vûi dan tur ngaihtuahin an ṭhukhawm dawn a. Pope thar thlang tur hian Cardinal 138 an awm rin a ni.
Pope Francis-a chanchin hi sawi tur a tam a, a tam tawlh tawlh dawn niin a lang a. Kan la sawizawm zel dawn nia.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: