PATHIANIN A KHAWNGAIHNA A HMUHTIR CHE

_Isuan i nun a tihharh leh dan_

- Rick Warren

- Apr 16, 2025

"Kan sual te la bo tura Isuaa rinna kan nghah phawt chuan Pathianin min pawmin thiam min chantir ang a- 'sualna nei lo' min la ti ang. Hetiang hian tute pawh, kan hun kal tawh chu engpawhnise Krista hnen kan pan chuan chhandam kan ni thei ang."_ (Rom 3:22, TLB)

Khawngaihna chu Pathianin a hmangaih che avanga a thiltih hi a ni. I phu tawk ni lo vin, i mamawh a pe che a ni. 

Khawngaihna chu thil thlawn pek a ni a - Isua zuitu tak tak ni tur chuan i pawm a ngai a ni.

Bible chuan, “Mi pakhat sual avanga thihnain chu mi pakhat avang maha ro a rel si chuan, khawngaihna nasa tak leh felna thilpek hmutute chuan, mi pakhat (Isua Krista) avang khan nunnaah chuan ro an rel ngei ang.” Rom 5:17  

Pathianin kan chunga a khawngaihna a lantirna ropui berte zinga mi chu ngaihdamna hi a ni. Buaina hrang hrang ka neih thin avangin ngaihdamna hi kan mamawh berte zinga mi a ni. Kan mamawh tih kan hriat hma leh kan dil hma hauh pawhin Pathian chuan min ngaidam tawh a ni. Pathian kan rin avanga a khawngaihna kan channa chu ngaihdamna hi a ni.

Living Bible ah chuan, "Kan sual te la bo tura Isuaa rinna kan nghah phawt chuan Pathianin min pawmin thiam min chantir ang a- 'sualna nei lo' min la ti ang. Hetiang hian tute pawh, kan hun kal tawh chu engpawhnise Krista hnen kan pan chuan chhandam kan ni thei ang."_ (Rom 3:22)

Pathian khawngaihna chu engtin nge i chan ve? I hlawhchhuak thei si lo va. Pathian khawngaihna i pawm theihna tur kawng khat chiah a awm: i mamawh tih pawm ang che.

Engti kawngzawng mahin vanramah i lut theilo tih i inhria a, a chhan chu vanram chu a famkima, nangmah i famkim si lo va. Vanram kaina tur ringawt ni lo vin, awmze neia i nun theihna turin i chapona kha dah tha la, khawngaihna i mamawh zia i inhre thei ang. 

Marka 10:15 ah chuan, “Tu pawh Pathian ram chu naupang tein a lawm anga lawm lo apiang, a chhungah an lut tawp lo vang” a ti a.

Naupang chuan a pa hmaah inchhuang takin engmah a sawi thei lo. “Ka pa, ka ti thei lo. Min pui rawh,”an ti zawk thin a ni.

Tu pawh ni la, eng thil pawh lo ti tawh pawh ni la, i Pa vana mi hnenah vawiinah hian lo kal la, a khawngaihna lo pawm ang che.

Ngaihtuah zui atan

* Khawngaihna chu a thlawn a ni tho si a, engvangin nge Pathian hian khawngaihna chu pawm tura ke pen ve tura min duhna chhan nia i hriat?

* Pathian ngaihdam theihloh tur khawpa lian sual rapthlak eng nge i neih? Vawiinah hian ring turin engnge i thlan ang?

* Pathian hnenah tlawmna nun i neih theih nan i dil em? Engvang nge?

*Isuaah ila innghat lo va, ila ring lo anih chuan, engvangin nge ila nghah cheu?*

Kan vai hian kan sual vek a – mahse Pathian chuan a hmangaihna leh ngaihdamna a lantir a. Bible chuan vanram chu Pathian rinna Fapa, Isua Krista kaltlanga in neih chauhin in lut thei ang a ti a. Vanram chu nangmaha i hlawhchhuah mai theih a ni lo. “Rinna avanga khawngaihnaa chhandam in ni; nangmahni thawhchhuah a ni lo va, Pathian thilpek a ni; thiltih avang a ni lo ve, chutilo chuan miin an chhuang dah ang e.” Ephesi 2:8-9

I sualna te i puang duh aniha, i nunah Isua i thlang duh anih chuan, heti hian tawngtai ang che.

“Lalpa, thu min tiam angin, Isua ka ring a nih chuan, ka tihsual zawng zawngte min ngaidam dawn a, ka nun awmzia te ka zir ang a, engtikniah emaw chuan i chatuan in nuamah min lo pawm ve ngei dawn a  ni.

“Ka sualnate ka puang a, ka Lalpa leh Chhandamtu atan Isua hi ka pawm e. Isu, i hnung zuia, i rawngbawl ka duh e. Ka nun tlawm tak hi ka hlan che a, i ang chhunga min pawma min chhandam ve turin ka dil a che. Amen”

Hetianga i tawngtai a nih chuan, Rick@PastorRick.com ah hian email min lo thawn la. Isua nena zinkawng i zawhtanna atana pawimawh te a thlawnin ka lo thawn ang che.

*[Lettu: Sangpuia]*