Aizawl | April 15, 2025: MZP General Headquarters, Aizawl chuan vawiin April ni 15, 2025(Thawhlehni) tlai dar 4:30 khan Pu Lalduhoma, Chief Minister chu a Pisa-ah hmuin, Phuldungsei, Mamit District a Tripura sawrkar hmalakna, raltlan chungchang leh pawl chhung thil pawimawh hrang hrangte sawipuiin hmuh a ni.
MZP chuan, Aizawl Post chanchinbu in a ni 13 & 14 April, 2025 chhuak a 'Phuldungsei ram chhungah Tripura in hnathawk' tih bawhzuiin Chief Minister hnenah hian an thlen a, Thaidawr tlang hi Mizoram leh Tripura ram inchuhna hmun niin, October ni 16, 2020 khan District Magistrate, Mamit District in Prohibitory Order chhuahin, thuchhuah ah hian mi 5 emaw a aia tam punkhawm khap alo ni tawh a, helai hmun hi a rang lama sawrkar in ngaihven tur leh Tripura sawrkar hmalakna hi tih tawp tir turin Chief Minister leh Home Minister ngen nghal an ni.
He hunah hian, Raltlan chungchang pawh sawipui niin, tu emaw political game vanga kan unau raltlante ngaih theih lohna social media a lian chho em em chu MZP chuan pawi a ti hle a, chutih rualin raltlante chhinchhiah ngei chu ngaiin a hria a, thil ti sual leh dan loa che te hriatchhuah zung zung na tur chhinchhiahna fel fai tak chu a rang lama kalpui vat turin Chief Minister an ngen bawk a ni.
MZP chuan kumin June ni 30, 2025 hian, MZP bultumin 'Remna Ni' chu Lammual-ah ropui taka hman tum a ni a, he hunah hian Remna leh Muanna hlut zia hre reng chungin mizo mipuite he hunah hian lo tel vek turin an sawm nghal a ni.
Post a Comment
He post chungchanga i ngaihdan lo sawi ve rawh: