MZP Champhai leh Champhai Bethel mipuiin PS Muanga thihnaa inhnamhnawihte dan anga hrem phut

Aizawl | April 3, 2024: MZP Headquarters Champhai leh Champhai Bethel mipuiin PS Muanga thihnaa inhnamhnawihte dan anga hrem an phut.

Mizo Zirlai Pawl (MZP) Headquarters, Champhai chuan, an thawhpui, Executive Committee member PS Muanga thihnaa inhnamhnawihte man an ni lawmawm an ti a, Champhai Bethel Veng mipuite tanrualna lawmawm an ti.

Champhai Bethel VC leh NGO hrang hrang - YMA, MHIP leh MUP te chuan thuchhuah intawm siamin, "Dawihzep taka insualrawn hi kan dem takzet a. Kan ramah hetiang thil hi thleng nawn tawh lo se kan duh takzet a ni." an ti a. "hetiang thil hi a thlen nawn tawh loh nan rorelna dik tak hmuh kan phut tlat a ni." an ti a.

Bethel veng mipui aiawhte hian, "PS Muanga tualthihna chungchangah hian rorelna dik kan hmuh ngei theih nan Bethel Veng mipuite kan tang tlang zel dawn a, thu dik hai chhuah a nih ngei theih nan a tawp thlengin kan tang zel dawn a ni." tiin thuchhuahah hian an tarlang a, MZP Champhai hmalakna lawmawm an tih thu an sawi bawk.

MZP chuan thuchhuah siamin, "Dt. 29th March 2025 zana kan thawhpui Pausianmuanga (PS Muanga) (Executive Committee Member) Mizo Zirlai Pawl Headquarters Champhaiin vanduaina a tawh chungchangah Champhai Police ten theihtawp an chhuah a, pawikawihtua puhte man an ni hi lawmawm kan tiin Champhai Police te chungah lawmthu kan sawi takzet a. Tin, Bethel khawtlang hruaitute hmalaknaah lawmthu kan sawi takzet a ni. Tin, Bethel veng NGO hruaitute leh veng mipuite ṭanrualna kan hmuhin Bethel veng khawtlang chungah lawmthu kan sawi takzet a ni. " an ti a.

He tualthihnaa inhnamhnawiha puhte chu;

1. Lalruatthara s/o Zamawia Kanan Veng, Champhai.

2. Vanlalpeka s/o Zamawia Keifangtlang , Champhai.

3. Jonny Lawmsangpuia s/o R.Thankhama Electric Veng, Champhai.

4. MC. Zohmangaiha s/o MC. Thangthuama Keifangtlang, Champhai.

5. Lalhriatpuia s/o Thantluanga(L) Vength l ang, Champhai.

6. Lalrinmuana s/o Zoramnghinga, Hmunhmel ṭha, Champhai.

7. Zarzoliana s/o Lalrintluanga Kahrawt Veng, Champhai.

8. Lalrinenga s/o Zonunsangi Keifangtlang, Champhai.

9. Lalfakmawia s/o T.Lalenzuala Tlangsam, Champhai.

"He tualthihnaa inhnamhnawiha puhte hian dan ang taka an phu tawk hremna an hmuh ngei kan phut tlat a, PS Muanga thih dan dik tak hi hriat chhuah a nih theih ngei kan beisei bawk."

"Kan thawhpui PS Muanga thihnaah hian pawikhawihtuten an thil tihsual phu tawka hrem an nih ngei theihnan a tawp thlengin Mizo Zirlai Pawl Headquarters Champhai chuan hma a la chhunzawm dawn a ni." tiin MZP chuan thuchhuah an siam.