MSU Cup 2025 a hmawr bawk

Aizawl | April 24, 2025: Mizo Students’ Union(MSU), General Headquarters buatsaih Inter College MSU Cup 2025, Sports bika inelna chu vawiin 24th April 2025 khan Lammual ah neih zawh a ni a. Sports & Youth Services Minister Lalnghinglova Hmar chuan Closing Programme hi Khuallian niin a hmanpui.

Lalnghinglova Hmar chuan, zirlaite chu zirna kawnga ṭan lak uar thar turin a fuih a. Kan tun hunah inelna a san tawh avangin theihtawp chhuah aṭul thu a sawi a ni. Tin, Mizoram Sawrkar chuan Sports lamah hmachhawp lian a neih chhoh mek thu sawiin, 2036 Summer Olympic India in thlen a dil mek atan hian infiammi buatsaih chhoh mek an tum thu a sawi a. Naupang infiamna kawnga talent nei kum 8-15 inkar te ah ṭan lak bik an tum thu a sawi a ni.

Sports & Youth Services Department Minister chuan MSU Cup 2025 tluang tak leh hlawhtling tak a buatsaih a ni chu lawmawm a tih thu sawiin, zirlai nih chhung chuan zirna dah pawimawh hmasak ber a tul thu a sawi a. Chutihrual chuan taksa hriselna leh rilru hriselna chu kalkawp tlat a nih avangin taksa sawizawi nana hun siam a pawimawh thu a sawi.

India in thlen a tum, Olympics 2036 ah mizo thalai tam thei ang ber an tel theih nan Lalnghinglova Hmar chuan Mizoram Sawrkarin Vision Olympics 2036 kalpui a tum thu a sawi a. National Games hnuhnung ber a Mizoram dinhmun enin infiamna discipline hrang hrangah hmalakna tur tam tak a awm thu a sawi.

Sports Minister chuan Mizoram sawrkar leh Innovations India tangkawpin April ni 26 hian Aizawl International Half Marathon a buatsaih tur thu sawiin, hei hi taksa sawizawi leh hriselna ngaih pawimawh a tulzia mipui hnen a zirtirna tura ruahman a nih thu a tarlang a. Hei aia changtlung leh lian tham zawk a buatsaih chhunzawm tum a nih thu a sawi bawk a ni.

AR Lammual-A Mizo Student Union Cup 2025 kharna hun hi MSU Treasurer Lalrampanmawia'n kaihruaiin MSU President B Lalkhawngaihzuala leh NIT Mizoram Director Prof. S Sundar ten thu an sawi.

MSU Cup 2025-ah hian Aizawl district chhunga College 8 te an tel a. Football (mipa), Volleyball (hmeichhia) leh Cricket (mipa) ahte inelna buatsaih a ni. Govt. T.Romana College chu Football ah an Champion a, Govt. Hrangbana College chu Volleyball leh Cricket ah an Champion thung a ni.

MSU Cup Sport khar ni-ah hian Mipa Football Final hmuhnawm tak thlir ho niin, Govt.T.Romana College leh Govt. Aizawl College te inkhelah 5 - 0 in Govt.T. Romana College in hnehna an chang a ni.

Football hmanga inelnaah hian heng te hi lawmman dawngtu te chu an ni:

Champion : Govt. T Romana College

Runners Up : Govt. Aizawl College

Top Scorer : Vanlalrohlua, Govt.Johnson College

Best Goalkeeper : Joel B.Lalramchhana, Govt. T.Romana College

Best Player : Peter Hlychho, Govt. T.Romana College

Volleyball (Hmeichhia) inelnaa lawmman dawngtu te chu heng mite hi an ni :

Champion : Govt. Hrangbana College

Runners Up : Govt. J Thankima College

Best Spiker : Elisian Medaii, Govt. Hrangbana College

Best Setter : Lalkhumtiri, Govt. Hrangbana College

Best Player : Lalbiakngheti, Govt. Hrangbana College

Cricket hmanga inelnaah hian hetiang hi lawmman lak dan a ni :

Champion : Govt. Hrangbana College

Runners Up : Govt. Aizawl College

Best Bat Man : Sahil Sharma, Govt. Aizawl College

Best Bowler : F.Malsawmtluanga, Govt. Hrangbana College

Most Valuable Player : F.Malsawmtluanga, Govt. Hrangbana College

MSU Cup 2025 a Items hnuhnung ber Miss Multimedia hi April 26, 2025 (Inrinni) zan hian a thlanna Chanmari YMA Hall ah neih tur a ni a. Aizawl South III Bialtu MLA Baryl Vanneihsangi'n Khuallian niin a hmanpui ang.

MSU Miss Multimedia hi Mizo Students’ Union Instagram Account kaltlangin mipui vote (Likes & Comments) hmanga thlan hmasak tur a ni ang a. Hei hian 50% mark a keng ang.