MNF, Mizoram Convention leh Tripura YMA te meeting - "political advantage la tura lo kal kan ni lo, Mizo hnam party, hnam thluthlunga ding kan nihna anga lo kal kan ni zawk,"

Aizawl | April 22, 2025: Vawiin April ni 22, 2025 (Thawhlehni) khan MNF Senior Vice President, Dr R Lalthangliana leh MNF General Headquarters hruaitu engemaw zatte chuan Zampui Phuldungsei tlawhin Tourist Lodge-ah Mizo Convention Zampui aiawhte leh Tripura Group YMA aiawhte nen 'meeting pawimawh tak' an nei.

He hunah hian MNF Senior Vice President Dr R Lalthangliana chuan MNF-in a ngaih pawimawh hmasak ber chu Zofa khawvel hmun hrang hranga awmte insuihkhawm leh tha taka impumkhat hi a ni a. He lai tlangdungah in harsatna hi MNF chuan chhete mahin kan tlanchhiatsan ngai lo ang che u. Vawiinah hian political advantage la tura lo kal kan ni lova, Mizo hnam party, hnam thluthlunga ding kan nihna anga lokal kan ni zawk. Kan term kal ta khan pawisa remchang kan dap a, Thaidawr tlangah Tawngtaina in sakna tur Trade & Commerce atangin cheng nuai 20 vel kan pe che u a, TJ Lalnuntluanga Transport Minister a nih lai khan Zampui tlang dung thlengin MST Bus a service tir a nih kha, a ti.

Covid laia Health Minister ka nih lai khan heng lai hmuna in dinhmunte ngaihsak turin Tripura Health Minister pawh ka rawn be fo a. Mizoram hi in inpui ber kan nih avangin, koh ei theihin kan awm reng tur a ni tih chu MNF ngaihdan a ni. He laiah tun hnaiah Minister leh MZP-te pawh an lokal tih kan hria a, an chungah kan lawm hle a. Mangan ni leh lawm lai nite kan nei fo ang a, tha taka inbe pawp tawn zelin, vawiina kan inhmuh khawmna hian rah tha tak a chhuah ngei ka beisei a ni, a ti.

Dr.Thangtea chuan ZPM sokar lolang ve zawk mek hi a thatna lai a awm ve tho nia sawiin, thil tih theih loh tawp tur zuarin 'min enchhin rawh u' an ti reng a. Kum khat leh a chanve vel an sorkarah hian kut hnathawktute an mangangin anmahni ngei pawh an mangang tan tawh hle a, a sawi a sawi ringawt ni lovin an ze dik tak mipuiin an hmuhna hun remchang tha tak a ni a, a dawt lehah chuan MNF bawk hi kan sorkar leh ngei dawn a ni, a ti bawk.

MLA & MNF Gen.Hqrs. Adviser Er. H Lalzirliana pawhin, "Eng emaw chen chu he lai history hi ka hre ve a, Mizo Convention leh Group YMA-te hi a dai theutu in ni a, in hmalakna avangin tun thlengin helaiah hian kan la him hram hram a ni. Tuna Phuldungseiah ration Card issue kan neih mek chungchangah tuna Supply Minister thil tih dan hi a pawi takzet a ni. Mizorama Bru awm duh chu awm tir a, awm duh lo chu pemtir tih MNF sorkar hmasain a tifel kha a lawmawm takzet a. MNF chu Mizo Nationalism keng nungtu kan ni a, Pathian leh mipui zarah kan sorkar leh ngei ang a, in harsatna hi kan harsatna a ni a, theihtawp chhuahpui kan tum zel che u a ni. Tuna rorel mek party ai chuan MNF hian helai hmun dik tak hi kan hre chiang zawk a ni. Helai tlangah hian buaina nek nek a tam thin hle tih kan hria a. Tha takin thawhhona tha nei zel i la, harsatna tam tak kan su kaw ngei ang," a ti.

Tripura Group YMA President Lalnunfima pawhin MNF sorkar khan he lai hmun hi a ngaihsak thu leh Dr. Thangtea hian an sorkar laia YMA office a dinsak thu leh an dinhmun hrang hrangte a sawi. TJ Lalnuntluanga hian Transport Minister anih laiin Zampui tlangdung thlengin inpumkhatna MST Bus tlan tirin sum faiin kan hmalaknate min pui a, kan lawm hle a ni, a ti. He laiah hian Darlawng Hnam unaute nen tun thlengin buaina neuh neuh an neih thin thu a sawi bawk a, MNF hruaituteten a hmun ngeia an tlawh chu lawmawm a tih thu a sawi.

Mizo Convention aiawha thusawitu President JD Mawia chuan helai Phuldungsei hi kum 1912-ah din a nih thu sawiin, kum 1980-ah Mizo Convention hi hnam leh hnam inkarah buaina a chhuah avanga din anih thu a sawi a. Kan Bru unaute hian Thaidawr tlang hi kan Pathian awmna ram a ni tiin an sawi ve tlat a, buaina neuh neuh kan nei thin. 'Mizoram hi kan Jerusalem a ni' tiin kan ngai hle thin. Kan dinhmun hi Mizoram sorkar tan pawh a buaithlak thin khawpin kan hria, a ti a. MNF hian hnam inpumkhatna an ngai pawimawh tih sawiin, Zampui-ah MNF-in VC an dinsak chu official-a pawm a ni tawh avangin an lawmzia thu an sawi bawk.

He hun hi Pu TJ.Lalnuntluanga, General Secretary i/c Inter-state Relations & Ex-Minister chuan a kaihruai. MNF Gen.Hqrs., Adviser James B Ralte, Ex- MNA President Rochungnunga leh MNYF Hqrs. Vice President Lalnunmawia Pautu pawhin thu an sawi. Inkawmhona an neih zawh hnu hian Thaidawr tlang an fang ho a ni.

Dr.Thangtea hian ramri New Kawnpui Police Out Post-a duty-te chhun thingpui inna tur tangka fai a pe bawk. MNF Senior Vice President hi Er. H Lalzirliana MLA, TJ Lalnuntluanga Ex-Minister, MNF General Headquarters hruaitu eng emaw zat leh Ex-MNA Gen.Hqrs. bakah West Phaileng MNF Block hruaituten an tawiawm bawk a ni.