Aizawl | April 21, 2025: Vawiin khan ZPM General headquarters chuan Party Office ah chhung inkhawm kan hmanga, he huna thu sawitu Dr. Vanlalthlana Education Minister chuan, Zirna kawnga Sorkar hmalakna hrang hrangte a sawi bakah tun dinhmunah kan ram siam tha tura Pu Lalduhoma kaihruai ZPM Sorkar a that ber thu leh mipuite beisei innghahna awm chhun a nih thu a sawi.
Dr Mathlana chuan, “Sorkarna kan chan tirh khan India ram pumpuia zirna tehkhawngah Mizoram chu State leh UT 36 zingah a hniam ber dawttu kan ni a, tehkhawng hi Performance Index 2.0 hmanga kalpui niin, National Achievement Survey (NAS) hnuaiah uluk taka Zirlaite dinhmun zirchian a ni a, kan dinhmun hi a chhuanawm loh hle a ni. He dinhmun hi Sorkar hmasaten min chhawm a ni a, ZPM Sorkar tan kan bultanna a ni thung. He dinhmun atang hian midangte umphak tumin thapui thawhin kan tlan mek a, kum 20 leh kum 15 chuang lo sorkar tawh te khan kan ram zirna siam that an tum tak tak em tih chu kan dinhmun atang hian a lang chiang hle a ni. Chuti chung chuan nasa takin min bei a, min beihna lam apianga hawi hman kan ni lo, State leh UT dangte umphak tumin Mizoram Sorkar chuan hmalam kan pan mek a ni. Sorkar hmasate khan theih tawp an chhuah lo kan ti lo, amaherawh chu min thlenpui chin hi a lungawi thlak loh a, hmasawn kan ngai em a ni. Tunah hian Zirtirtu sem rual nan Transfer Rules kan buaipui mek a, kan hrualmum thei tep tawh a ni. School siam that leh sak that hna te, zirtirtu dinhmunte mipui hmuh theih turin vskmizoram.com ah entheihin kan phochhuak mek a mipuite pawhin lo ngaihven se kan duh hle a ni. Kan dinhmun chawisan a nih theih nan NITI Aayog te chu Mizoram zirna dinhmun zir chiang turin kan sawm a, an zirchianna hmangin Education summit kan huaihawt dawn a, kan harsatna lai zawn chhuah leh a sutkian dan tur ngaihtuah ho turin hmachhawp kan nei mek a ni. Hei bakah hian Mizoram Education Reforms Committee kan din a, anni hian nasa takin hma an la bawk a ni,” a ti.
Education Minister chuan, “Sorkar hmasa khan an term tawp dawn lamah tlanchhe chungin School 180 lai sorkar school ah a puang a, Dan behchhan tur awm miah lovin School 52 chu Provisional Adhoc – ah hlankai an ni a, Lumpsum School awmsa leh a thar an puan hi 108 lai a ni bawk. Upgradation atana School an chhawpchhuah thenkhat chu naupang pawh nei lo te, bulding pawh nei lo te, thenkhat awm tawh lo (defunct) tawh te leh khawtlang enkawl pawh ni lo private school te an lo awm a, MLA Election awm tur thlir chunga an tih a nih avang khan a phuai luai hle a ni,”a ti.
Minister chuan, “Tunah hian Mizoram Government School Teacher’s Union (MIGOTSU) ten badge dum belin Sorkarah lungawilohna an lantir mek a, Education department in theih tawp chhuaha an tana hma kan laknate ngaihtuah chuan an lungawizo lo hi mak kan ti hle a ni. Dan awm sa in School upgrade tura a huam loh te pawh an tel theihna turin Dan kan siam belh mek a, an tana hma kan lakna hi ngaichang thiam sela kan duh hle a ni. College lamah pawh Siaha, Lawngtlai leh Kalmanagar College te an indaih lo viau emaw kan tih laiin Aizawl a kan College te pawh an lo indaih lo hle mai a, MPSC kal tlangin Lecturer 30 direct a lak kan tum mek ani. Mizoram Polytechnic Lunglei hi kum 2021 ah sorkarin a khin let loh avangin a khingtuten thiam an chang a, kum 2022 ah court in Rs nuai 98 ram luah man pe turin sorkar a hriattir leh a, chu pawh khin let lohvin a awm a ni. Kan sorkar ve leh khan High Court ah appeal kan tum a, appeal hun a lo pel tawh a. Tunah hian Supreme court ah kan dil leh mek a ni. Sorkar hmasate khan thil tha tamtak an lo ti chung khan a lera lan mawi ringawt kha an thupui niin a lang a, RUSA hnuaia School an lo sak te pawh kum rei lo te ah thawm that a ngai leh nghal der tawh a ni. Zirna siam tha tur hian theihtawp kan chhuah zel dawn a, Union Home Minister, Pu Amit Shah a lo zin tum khan Central Service ah Mizote kan luh tam leh theihna turin Coaching Center tha kan lo dil a, a hlawhtling dawn niin kan hriaa a lawmawm tak zet a ni. Kan hmabak ko zia hi eptu Party te tluka hrechiang an awm lo a, an sulhnu kan chhui mek a ni. Tun dinhmunah hian kan ram siamtha tur chuan ZPM Party hi kan tha ber a, theih tawp kan chhuah mek a,a tum pawh hi kan tum hle a ni. Kawng hrang hranga ZPM sorkar hma laknate hi kan sawi vek seng dawn lova, zirna mai bakah kuthnathawktute tan, kan thalaite tan a takin kan che chhuak mek a, hmasawnna thar pawh kan hmuh zel ka beisei a ni,” a ti bawk.
Vawiin party chhung inkhawm hi ZPM General Secretary T Thanglura'n a kaihruaia, KL Remsiama'n hunserh hmangin ZPM Gen.Headquarter Vice President Lalchhuanthanga MLA, leh Adviser to CM (Pol) Lalmuanpuia Punte, MLA ten an telpui bawk a ni
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: