Aizawl | April 21, 2025: Catholic kohhran hotu leh vatican hotu - Pope Francis chu kum 88 mi niin a thi.
Vatican atanga thu dawn danin, Pope Francis hi April 21, 2025 (Easter Monday) zing dar 7:35 (local time) khan a chenna, Vatican-a Casa Santa Marta-ah a thi a ni.
Cardinal Farrell chuan Pope thih thu hi a puang a, "Kan Pa Thianghlim Francis-a thih thu lungngai takin ka puang a ni. A dam chhung zawng Lalpa leh a Kohhran rawngbawl nan a hmang zo a ni," a ti.
Pope Francis (Cardinal Jorge Mario Bergoglio) hi Pope Benedict XVI-a'n hmun a ken hnuah, March 2013 khan Catholic Kohhran hruaitu lu ber atan thlan tlin a lo ni tawh a ni.
POPE FRANCIS KUM 88 MI A THI
- CT Lalrinawma
Pope Francis chu vawiin zing 7:38 (local time) khan a thi tih, Cardinal Kevin Farell chuan a puang.
Pope hi kum 88 mi a ni a, South America atanga Roman Catholic kohhran hruaitu atan thlan niin, Argentina khawpui Beunos Aires ah Bishop in a awm thin. Amah pawh Argentina rama piang a ni. Khawvel chuan Pope hi "People's Pope" tiin an ko.
Pope Francis hian Easter Sunday ah US Vice President J.D.Vance a hmu a, Easter Sunday ah hlim takin, Catholic mipuite chu hun a hmanpui a ni.
Pope Francis hian LGBTQ ho a pawm a, liberal tak ni a puh a ni a, mahse, ani Pope chuan, "Gay hoten Pathian duha an zawng a nih chuan, lo hnar a, ro lo relsak tur em ni dawn?” tiin American Catholic Conservative hote an ngihdan kulmuk tak mai chu, “mahni intihhlum theihna" thilah ngaihsakin, pawm zau thiam a tul ti zawngin a chhang a ni.
Roman Catholic kohhran dan angin, Pope thih hnu ni 15-20 chhungin amah thlaktu tur thlan tur a ni.
Kumin Feb.14 khan Bronchitis vangin damdawi inah dah luh a ni a, a thisen te an enfiah a, platelets blood, anaemia tla chham tih niin, Feb.22 phei chuan a dinhmun a tha lo hle a, thawkna lamah harsatna tawkin oxygen hial pek a ni a, a kal (kidney) pawh a chak tawklo, tih a ni.
Pope Francis hi a hming tak chu Jorge Mario Bergolio a ni a, kum 2013 ah khawvela Roman Catholic tluklehdingawn 1.4 te hruaitu lu ber "Pope" ni tura thlan a ni.
Damdawi ina a awm hnu Feb. 22 khan St Peter's Square, Rome khawpuiah mi sang tam tak ama tana tawngtaitu awmin pangpar leh thuziak te an dah ṭeuh va. March 6 khan amah tawngtai saktute hnena lawmthu sawina chu hospital atangin a aw record in tihchhuah a ni. Pope hi kum 2021 khan a taksaa bawk (colon) awm zai tawk tawh niin, 2023 ah a ril lam chian loh vangin enkawl a lo ni tawh bawk.
Kum 2016 ah raltlan (refugee) te ke a sil sak vangin leh LGBTQ a pawm vangin, mi thenkhat chuan "Mipuite Pope" (People's Pope) tiin an koh phah hial a ni.
Pope Francise hi tunge a nih?
- Laldinpuia
A hming tak chu Jorge Mario Bergoglio a ni a, December 17 1936-ah khan Argentina khawpui Buenos Aires hmunah lo piangin a pa chu Mario Jose Bergoglio a ni a, railway a thawk thin a ni. A nu hming chu Regina Maria Sivori a ni.
University of Buenos Aires atangin Chemistry-ah Master Degree a zo a, kum 21 mi a nihin puithiam atan hian a inserh hrang tan a ni.
Kum 1969-ah puithiam atan nemngheh a ni a, kum 1998 atanga 2013 thlengin Buenos Aires-ah Archbishop hna a thawk a, Pope John Paul II khan kum 2001 ah Cardinal ah a dah a, kum 2013 March 13-ah Pope Benedict XVI thlakin Pope a thlan tlin a lo ni ta a ni.
Pope Francis-a hi Jesuit puithiam Pope ni hmasa ber leh America mi leh sa Pope atana thlan hmasak ber a ni Syria mi Pope George III kum 741AD a borla ta hnu lama European mi nilo Pope dinhmun chelh thei hmasa ber a ni bawk
Roman Kohhran hotu leh Vatican roreltu
March 13, 2013-ah Pope atan thlan tlin a ni a, amah hi Roman Kohhran-a Pope 266-na a ni Bergoglio hian Roman Catholic Kohhran hotu lu ber nihna a chelh rual hian Vatican City State a hotu ber nihna a chelh tel nghal a ni.
Bergoglio hian a Pope title atan hian Francis tih a thlang a, hei hi mi thianghlim Francis of Assisi hriatrengna atana a thlan a ni a, a chhan chu mithianghlim Francis-a hi mirethei te hmangaihtu anih vang ani tiin Vatican thupuangtu chuan a sawi
Francis tih hming hi Roman Pope te hian an hman vawi khatna a ni.
Mite hmangaihtu
Bergoglio hi February 2001 khan Pope John Paul II chuan Cardinal-atan a nemnghet a, Pope John Paul II a thih pawh khan Pope ni mai thei tura rinkai zingah telin kum 2005 a Pope thar tur Cardinal ten an thlan tum pawh khan a tel ve bawk a. Inthlannaa Pope Benedict XVI thlan tlin anih pawh khan amah hnaih bertu zingah Bergoglio hi a tel niin sawi a ni.
Pope John Paul II vuinaah pawh khan a tel bawk.
Bergoglio hi Cardinal atana dah anih hnuah pawh hian miten a chanchin an hre lar hle a, a mihring inngaihtlawmna te, kohhran humhalh leh siamthat a tum dan leh rorelna dik kenkawh a tum danah te mite hriat a hlawh hle a. A nun hman dan tlawm tak mai chuan mite rilru a hneh hle a, bishop ho chenna lal inah pawh cheng duh lovin in te tak teah a khawsa zawk thin. Car manto leh changkang tak takah pawh chuang duh lovin vantlang veivahna angah hian a kal ve mai thin. Amah hi inngaitlawm tak mai anih avangin Bishop ho an inhmuhkhawm pawhin tlar hnung lam a chuh hram hram thin niin a chanchin ziaktu Sergio Rubin chuan a tarlang.
Bergoglio hi neih inang inkawp (gay marriage) duhlotu te zing ami a ni a, kum 2010 a Agrentina sawrkarin gay marriage a pawmpui dawn pawh khan a duhlo langsartute zingah telin mahse kha dan kha kenkawh tlang a ni ta tho a ni.
(A ziaktute zah tak chungin dahchhawn a ni. - Founder)
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: