I RITPHURH ZAWNG ZAWNG NEN ISUA RAWN PAN RAWH

_Kut Ruaka kal_

- Rick Warren

- Apr 22, 2025

“Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u. Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi; tichuan, in thlarau tan chawlhna in hmu ang. Ka nghawngkawl chu a nuam a, ka phur pawh a zang a ni.” Matthaia 11:28-30

Hringnun hi ilo belchiang tawh em? I phur a rit poh leh i tlanchak tih hi. Chu chu lirthei ah a dik a - i nun ah pawh a dik em em a ni.

Thenkhat chu  taksa, rilru leh inlaichinna kawngah te an phurrit hle a ni. Hna hautak lutuk te, chhungkaw thil tul te leh sum leh pai mamawhnate hian rilru lamah nasa takin a nghawng thin a ni.

Bible chuan Matthaia 11:28-30 ah, “Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u. Ka nghawngkawl bat ula, ka hnenah zir rawh u; thuhnuairawlh leh rilrua inngaitlawm tak ka nih hi; tichuan, in thlarau tan chawlhna in hmu ang. Ka nghawngkawl chu a nuam a, ka phur pawh a zang a ni.”

Isuan rilru lama thawpikna tihkian dan mawlmang takin min zirtir a, chungte chu - ‘lo kal la, la la, zir rawh u,’ a tihte hi anni. Heng pathumte hi i man thiam chuan i nun a thlak danglam dawn a ni.

A pakhatna hi ilo zir dawn teh ang: *Isua lo pan rawh.* I ritphurt luat avanga i chau anih chuan, a chhawkna chu hun awl neih emaw ruahmanna dang emaw a ni lo. Isuan, “ka hnenah lo kal la” a tih ang ngeia, a hnen pan hi a ni. I nunah ritphurh i ngah viau anih chuan, Isuan a hnen pan turin a duh che a ni. Chutiang taka i pan chuan, a lo hahdam tir ang che.

 Isuan a pek chawlhna hi chu, chawlhna danglam bik a ni. Thlarau lam chawlhna, i thlarau chawlhna tur a ni. Chumi tello chuan awmzia a nei bik lo ang.

Thlarau chawlhna chu taksa chawlhna aiin a thuk zawk a. Rilru hahna, chauhna, lungngaihna, hlauhna, khakna leh sual nia inhriatna laka damna a ni. Pathian chauhin chhungrila thlamuanna leh i thawpikna tihkianna a pe thei che a ni. Chu chuan i rilru ti hahtute chu a tibo dawn tihna erawh chu a ni lo. Isuan a phurhpui dawn che avangin chung i rilru tihahtute chuan an tibuai lutuk tawh lo ang che.    

Chutiang anih si chuan, engvangin nge Isua hnenah chuan kan kal fo loh? Keimahniin kan inchinfel theih kan inrin avang tein a ni thin. Ruahmanna siam emaw hun hman emaw i mamawh. I mamawh chu Isua hi a ni. Krista hnen ah kal ang che. “Nangni thawk rim leh phurrit phur zawng zawngte u, ka hnenah lo kal ula, keiman ka chawlhtir ang che u.”

Naktuk lamah, thawpikna tihkian dan tur kan zirho leh ang.    

Ngaihtuah zui atan

* I phur a rit poh leh i tlan chak leh zual tih hi i lo inhre tawh em?

* I rilru a hah changin Isua lam i hawi hmasa thin em? A nih loh chuan, khawi lam nge i hawi thin le?

* Engtiklai khan nge thlarau chawlhna i hmuh? Engtinnge chawlhna chu i hmuh fo theihnan tan i lak ang?

*[Lettu: Sangpuia]*