Aizawl | April 15, 2025: Chief Secretary charge la mektu H Lalengmawia’n vawiin chawhma dar 11 khan Press Conference kovin CSS hnuaia thawkte chu, a tam zawk hi dik leh mumal taka lak an nih loh avangin dah ngheh theih an ni lo, a ti a, "awmze mumal lo deuha lo lakte dahngheh / regularise kha Mizoram sorkarin a remti lo tih lam pawh a ni lo, Article 14 leh Article 16 hian a rem ti lo," a ti.
H Lalengmawia chuan, "Tuna an nawrh hi - sorkar nawrh khum hi khwngaih takin sut leh rham se sorkarin a duh tak tak a, thil a kal zel a, tin, boruak a sosang a nih chuan, hreh tak chung leh rilru na tak chung pawhin sorkarin a tih tur ang a tih si dawn kha chuan, tuna no work no pay tih mai piah lamah service tihtawp sak thleng pawh khan thil a awm lo ang tih a sawi theih si lova. Chuvang chuanin, hrethiam hram hram tur hian ka duh a, anni pawh ka chah nawn leh a, .. ni thum chhung kan han monitor ang a, a boruak a zirin sorkarin a tul angin hma chu a la chho zel mai turah kan ngai e," a ti.
H Lalengmawia, IAS chuan, "Tute mah kan demna ni lovin, kan naute ho hi an thiam loh pawh a ni chiah lova. A hunlai zel khan, DPC mumal lo, awm lo, Advertisement pawh chhuah lo, anmahni duhsaktute'n an lo lak ang chi kha a tam ber hi an ni tlat mai a ni. Chutiang mi, awmze mumal lo deuha lo lakte dahngheh / regularise kha Mizoram sorkarin a remti lo tih lam pawh a ni lo, Article 14 leh 16 hian a remti lo tlat mai a ni." a ti bawk.
H Lalengmawia chuan CSS hnuaia dan loa lak te dah ngheh an nih chuan an tlukpui te courtah zualkoin sawrkar an khin chuan sawrkarin thiam a chang dawn lo a ti a, mitin angkhat veka en a ngai tih sawiin All Mizoram CSS Employees Coordination Committee (AMCECC) thilphut ti hlawhtling tur chuan Mizoram sawrkarin India danpui a bawhchhiat a ngai dawn a ti a, lungawilohna an lantir chhungin sawrkarin hlawh a cut sak dawn tih sawiin an kal thui zel chuan an service a tawrh palh theih thu a sawi bawk.
H Lalengmawia chuan, DPC kaltlanga lak an nih loh avang leh induhsakna avanga hna inpek a tam hle a ti a, lak dan mumal lo taka lak an nih avangin seniority list pawh an nei hleithei lo tih sawiin NHM leh SSA thawktu zingah an tam zual a ti a, CSS Regularisation Scheme kalpui tura thil tul leh pawimawh tak chu inter seniority niin hei hi tihfel a harsat dawn avang leh mumal lo taka thil a kal tam tawh avangin CSS Regularisation Scheme chu kalpui theih a nilo a ti a, India danpui hnuaia Article 14 leh Article 16 an bawhchhe thianglo tih sawiin dan anga lak loh ten an hmang ve theilo tih a sawi.
AMCECC hian an thil phut hrang hrangte avanga vawiin atang khan sorkar nawr nan Pen/Tool Down Strike an kalpui tan a, thu leh a awm a nih loh chuan, April 17 thleng kalpui an tum a ni.
Nimin khan sorkar chuan OM tichhuakin AMCECC te hi, "Enforcement of CSS (Conduct) Rules, 1964 and No Work No Pay, chungchang Office Memorandum (No.C.13015/4/2020-GAD Dt. 14th April, 2025) a lo chhuah hnan tawh a ni.
AMCECC thil phutte:
1. Provisional Employees/State Contract-te tan an mamawh anga Departmental Promotion Committee (DPC) awlsam taka Sorkarin a siamsak thin ang hian CSS Employees-te tan DPC siam ngaiah leh Corresponding Post siam rem leh a tul dan a zira Equivalent/Temporary Post siam ngaiah min siamsak turin kan phut a ni.
2. CSS hnuaia thawkte hi hmasawnna hna hrang hrang thawktu leh Sorkar kut ke berte zing ami kan ni a, amaherawhchu, kawng hrang hrangah enhran leh hlamchhiah kan ni fo thin hi na kan ti a. Mizoram hmasawnna atan thahnemngai taka kan thawh angin hamthatna leh kan Service-ah min duhsak ve turin kan phut tlat a ni.
3. Mizoram Sorkar hnuaia a nghet a thawk ten a hun taka hlawh an lak thin laiin CSS hnuaia thawkte’n hlawh kan la mumal lo fo thin a, CSS kan kalpui danah tun aia chak leh zualin Central atanga Fund nawr chhuah a nih theih nan hma min laksak turin kan phut a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: