ATL Road dang mek Lunglei MZP chuan Sorkarin duhthlan tur a pek invaunaah ngai; Hmun hnihah Kawng dang tawh dawn!

Aizawl | April 28, 2025: Aizawl-Thenzawl-Lunglei Road (ATL Road) siamna sum dah phut-a lungawilohna lantir mek Lunglei MZP chuan Sorkar in duhthlan tur thil chi hnih a pek chu invaunaah ngaiin Kawng dan chhunzawm zel nise an ti.

MZP chuan an resolution angin pawisa pawhpen dah let leh chu an thil phut a nih thu leh CRRI ten project an siamah an ngaih a ngam lo tih an sawi. Invauna awka ah an ngai tih sawiin, naktuk zing dar 7 atangin kawng hi an dan chhunzawm tur thu sawiin, MZP hruaitute chuan, Pukpui bakah hian Hrangchalkawn lamah pawh kawng hi an dang tawh dawn thu an sawi.

MZP hruaitute hian vawiin khan Health Minister Lalrinpuii, CM Adviser Lalmuanpuia Punte leh V Malsawmtluanga ten an biak thu leh an thu thlenin an lungawina a thlen lo tih an sawi a, Sorkarin duhthlan tur a pek chu CRRI ten project an siam hunah cheng vbc 44.89 aia tam pawh an pe thei a, a daih bak erawh chu sawi theih a nih loh thu an sawi a, a pahnihnaah cheng vbc 44.89 chu a pek theih a, mahse CRRI te project a siam tir theih lovang tiin duh an thlang tur a ni, an ti. 

Tukin dar 7 atang khan ATL road hi Pukpui daiah dan a ni a. MZP leh a thlawptute hian Pukpui-ah lirthei lut leh chhuak tur an dang a. MZP te hian ATL Road siamna tur cheng vbc 90 leh nuai 69 chu ATL Road siam na’n hman vek an duh laiin cheng Vbc 45 leh nuai 60 chauh dah a Mausen leh Pukpui inkar kawngpui kilometer 14 chin chauh siam na’n Sorkar in a dah chu an hriatthiam loh thu an sawi a, MZP te hmalakna hi Lunglei mipui tam takin thlawpin Maxi-Cab Service pawhin vawiin khan an thlawpna lantir nan an service lo a ni.

Rorellai ZPM Southern Headquarters, Lunglei chuan ATL Road chungchangah chhim lam mipuite rilru natna chu awm an tih thu leh mipui rilru damna tur thutlukna sorkarin a siamsak hma chuan an party pisa-ah hna engmah thawh rih loh ni se an ti a, chhim mipuite beiseina angin ATL road siamna tur ruahman sak thuai turin sorkar an phut tih sawiin April ni 7 khan Lunglei West bialtu MLA leh ZPM Southern Hqtrs-in ATL Road bik enkawl tura an dah T Lalhlimpuia chuan ATL kawngpui chu ZPM Southern Hqrs anga a mawhphurhna a nih angin sorkarin a siam dawn lo a nih chuan MLA atanga chawlh a hreh loh thu Lunglei leh chhim mipuite’n hriatpui an duh thu an Party chhung inkhawmah a lo sawi tawh a ni.

- AIR Aizawl