Aizawl | March 19, 2025: Aizawl Mayor Lalrinenga Sailo chuan, "Danin min phalsak ang leh hmala tura phutna kan dawn hrang hrang te bawhzuiin AMC chuan Treasury Bazar leh a chhehvel kawngpui kama inphona hmun hi titawp turin hun rei tawh tak atang khan hma a lo la tawh a ni." a ti.
Kan hriat theuh angin, vanduaithlak takin Mizoram Legislative Assembly ngheng mai ke a kalna kawng, Treasury Bazar tia kan hriat lar, March ni 17, 2025 zing lam khan a kang a. Mi tam tak inzawrhna hmun leh bungraw tam tak a kangchhia a, PAMRA Office leh thingpui dawr a kang tel bawk tih kan hriat in AMC chuan pawi a ti takzet a, kangmei tuartute kan tawrhpuiin kan lainat hle a ni.
Chanchin kan hriat veleh AMC chuan chhiatna thlenna hmun hi kan tlawh nghal a. Chhiatna nasa zawk a thlen loh nan a hmun hi March ni 17, 2025 khan khar a ni a. March ni 18, 2025 khan Deputy Commissioner leh Chairperson, Aizawl District Disaster Management Authority chuan a chhehvel himna turin Treasury Bazar hi khar a nih thu a chhuah leh bawk a ni.
Kan hriat theuh angin, he bazar hi kan ram rorelna sang ber, Mizoram Legislative Assembly building ngheng a awm a ni a. Hun kaltaah khan he hmunah hian chhiatna a lo thleng nual tawh a. Bomb a lo puak tawh a, bomb hnathawh hian Mizoram Legislative Assembly building thenkhat a ti chhe nghe nghe a, tum tam tak kangmei a lo chhuak tawh bawk a, Ruang chhar te, Lungrem chim avanga nunna channa a lo thleng tawh bawk a ni. Tunah hian bang chim thei mai dinhmuna ding a awm bawk a, Tin, Drug Addict ho riahna hmun a nih thu te sawi a ni bawk a ni.
Tun tuma kangmei chhuak pawh hian a chhehvelah chhiatna nasa tak a thlen a, Mizoram Legislative Assembly bang te pawh a hliau tel a, a bula office pakhat a kang ral a, office pawimawh dang leh chenna in tam tak pawh dinhmun hlauhawm takah a siam a ni. Amaherawhchu, Fire & Emergency Service te thawh rimna zarah a bulhnaia awm office leh chenna in tam zawk chu a him hram hram a ni.
India ram sawrkar ah hian eizawnna mumal nei lo te intunnun nana kawng kama inzawrh theihna dan a awm a. Amaherawhchu, hmun pawimawh bik awmna bula thilzawrh hi a khap tlat thung a ni. Chuvangin, chhiatna nasa zawk, kan ram rohlu tam tak tichhe thei thil hi sawn mai a lo tul ta a ni. Chhiatna rapthlak tak thleng thei dinhmun a din reng ai chuan, tuna dan anga hmalak hi Aizawl mipui tana tha zawk a ni a. Aizawl mipuite pawhin min support tha viau a ni. Kan tlai chhiat tak tak hma hian mipui tam zawk te hmakhua ngaiin insawn hi kan tih ngei a ngai a ni.
Awlsamna chauh ngaihtuah avanga kan ram rorelna sang ber leh a chhehvela office pawimawh leh chenna in tana him lo a dah reng hi a fuh lo hle a. Mipui tam zawkte hamthatna leh sorkar thil pawimawh venhim hi kan ngaihpawimawh a tul a ni.
Kan hmuh ang hian AMC Multi-Complex, Tuikual South chu AMC in sum tam tak sengin kan sa a, kawng kama inzuar te sawnna turin bazar hmun nuam tak kan buatsaih a ni. Hetah hian Treasury Bazar-a inzuar thin zawng zawng te an leng vek a.
Tunlai khawvel changkang zelah khawpui chenna tlak leh changkang siam a pawimawh hle a. Kan tih dan thin tha lo lai te paih leh kalsan a, hma kan sawn zel a pawimawh a ni.
Mi chhiat tawh laia hma la thar thut anga ngai pawh lo awm palh theih a ni a, amaherawhchu hun rei tawh tak atang khan AMC chuan a sawnna hmun a lo buatsaih a. Helaia inzuar thinte nen pawh nen pawh agreement mumal tak siam a ni a. Vawi tamtak inbiakna neih a ni a, inzuar ten demand an neih hrang hrang te pawh tihpuitlin a lo ni tawh a ni.
Tin, kawng kama inpho (a bikin inrinniah), traffic ti jam leh motor tlan theih loh hial khawpa Aizawl mipuite harsatna min siam thin tu pawh hi AMC Multi-Complex, Tuikual South ah hian sawn thlak vek a ni dawn a ni.
AMC in kuthnathawk a eizawng te thlai leh sa hralhna hmun tha tak kan siam thei hi kan inchhuang ve hle a. Tuna insawn duh lo tlemte te pawh hi thil awmzia ngaihtuah chianga, AMC ruahmanna hi dodal lo turin kan ngen a ni.
AMC Multi-Complex, Tuikual South hi hun rei loteah mipui a hip hle turah kan ngai a, mi tamtak tan eizawnna a siam ang a, Aizawl mipuite tan chenfakawm tak a la nih ngei kan ring a ni.
Dan in min phalsak ang leh hmala tura phutna kan dawn hrang hrang te bawhzuiin AMC chuan Treasury Bazar leh a chhehvel kawngpui kama inphona hmun hi AMC chuan titawp turin hun rei tawh tak atang khan hma a lo la tawh a ni.
AMC hmalakna langsar zualte:
1. Street Vendors (Protection of Livelihood and Regulation of Street Vending) Act, 2014 hmangin hma lak a ni a. Treasury bazar leh a chhehvel hi survey neih a lo ni tawh thin a, kum 2016 - 2017 chhung khan vendors table 150 chuang siam a, pek a ni a. Hemi rual hian an insawnna tur buaipui nghal a ni a, tuna kan awmna building hi ruahman a lo ni daih tawh a ni.
2. December ni 9, 2016 khan Treasury Bazar Association leh AMC chuan agreement kan sign a. Agreement ah hian he bazar hi AMC in tha a tih hunah titawpin, hmundanga sawn theih a nih thu leh bazara hmangtuten harsatna an siam loh tur thu an intiam a.
3. Agreement a chunga tarlana inziak angin AMC leh Treasury Bazar Association thawhonain Bazar hman lai mek hi temporary a cheithat a ni.
4. March ni 20, 2023 ah AMC leh Treasury Bazar Association te Municipal Commissioner, AMC office ah meeting a ni a. Meeting a Treasury Bazar Association te ngenna hrang hrang te sawihoin, AMC chuan chak takin hma a la a, a tihlawhtling nghal a ni. Chung zingah chuan Sa zawrhna hmun siam danglam te, drain mumal zawk siam te a tel a ni.
5. AMC chuan November ni 14, 2023 khan ni 09.12.2016 a inremna angin AMC Multi-Complex, Tuikual South a insawn thla vek turin hriattirna a pe a.
6. Treasury Bazar Association te hian ni November ni 22, 2023 khan Municipal Commissioner, AMC ah ngenna thlenin, 2023 Christmas vuakvet chauh Bazar hluia thut phalsak hram turin an rawn dil a ni. Executive Council chuan 2024 kum tharah insawn vek turin a ti a ni a.
7. Treasury Bazar Association ten I&PR Building-a SHG dawr hawn chu Bazar Area a nih anga tihtawp sak tura AMC an ngenna angin AMC chuan a tul angin hma a laksak a. I&PR Department pawhin AMC ngenna ngaipawimawhin SHG Mart hi an khar a ni.
8. Ni May ni 1, 2024 khan Notification tihchhuak lehin, May ni 6, 2024 ral hmaa insawn thla vek tura hriattirna siam a ni leh a.
9. May ni 27 & 31, 2024 leh June ni 1, 2024 khan Treasury Bazara thilzuara thutute insawn tura hriattirna chu Local Newspaper ah chhuah a ni.
• • • • • •
Share it with your friends!
[Subscribe telegram channel for updates- https://t.me/exploremizoramchannel ]
[For Ads - Contact +919402125273 ]
EXPLORE MIZORAM
email: admin@exploremizoram.com
Telegram channel:
Twitter: https://twitter.com/exploremizoram
Instagram: https://www.instagram.com/explore.mizoram
Youtube Channel: https://www.youtube.com/channel/UCyNrX06aSZ26HkIB25eo1YQ
Post a Comment
He post chungchanga i ngaihdan lo sawi ve rawh: